- Taamaakkaluartoq annertuumik qisuariaateqartoqarpoq, taavalu aamma allakkatigut taasititsisoqarnerani aamma peqataasoqangaatsiarluni, taamaakkaluartoq isumaqarpunga inuit amerlanerat uani peqataasinnaanerat orniginarnerugaluartoq, borgmesteri oqarpoq.Assi: KNR

Borgmesteri eqqaassutissaq pillugu: Uninngatiinnarneqarnissaa ajunngilaq

Hans Egedep eqqaassutissaata uninngaannarnissaa Kommuneqarfik Sermersuup ajorinngilaa, inuilli sooq nuutsitserusunnersut borgmesterip paasisinnaavai.

Kommuneqarfik Sermersuup borgmesteriata, Charlotte Ludvigsenip (IA) eqqaassutissap uninngatiinnarneqarnissaa naatsorsuutigisimavaa. Oqallittoqangaatsialersimanerali nuannaarutigaa.

- Eqqaassutissap uninngaannarnissaa uanga ajorinngilara. Nunasiaajunnaarsaanerulli oqallisigineqarnera peqqinnartuusoraara, maannakkullu oqallikkunnaartariaqanngilagut.

Borgmesteri Hans Egedep eqqaassutissaata inuiattut ullorsiornermi juunip ulluisa 21-anni qalipaammik aappaluttumik kuineqarluni ”decolonize”-millu (nunasiaajunnaarsaanermik aaqq.) allagartalerneqarnera pillugu oqarpoq.

- Nuna namminiilersoq anguniartussaavarput, eqqaassutissarli uannut tassunga attuumassuteqanngilaq, Charlotte Ludvigsen oqarpoq.

Nuummi innuttaasut 1.500-it missaanniittut Hans Egedep eqqaassutissaata siunissaa pillugu sapaatini akunneri sisamani taasititsinermi taasipput. Taakkunannga 921-t uningatitsiinnarnissamut taasipput. 600-illu peersitserusullutik. Innuttaasut 23.000-it missaanniittut taasisinnaasuupput.

Taasisut amerlanerusinnaagaluartut

Taasisulli amerlanerusinnaagaluartut borgmesteri isumaqarpoq.

Nuummi innuttaasut eqqaassutissap siunissaanut atatillugu marlunnik assigiinngitsunik taasiffigisinnaasamik periarfissaqarput. Siullertullu allakkatigut taasinissaq periarfissaalluni.

Periarfissap aappaani qarasaasiatigut, Kommuneqarfik Sermersuup innuttaasunut attaveqarfiatigut nutaakkut ”Kommuneqarfiga”-kkut taasisoqarsinnaasimavoq.

- Taamaakkaluartoq annertuumik qisuariaateqartoqarpoq, taavalu aamma allakkatigut taasititsisoqarnerani aamma peqataasoqangaatsiarluni, taamaakkaluartoq isumaqarpunga inuit amerlanerat uani peqataasinnaanerat orniginarnerugaluartoq, borgmesteri oqarpoq.

Atsiornerit maanna katersorneqarput kommunimilu politikerinut nassiunneqassallutik.

Taasisut inerneri Aningaasaqarnermut ataatsimiititaliamut aggustip ulluisa 20-anni tunniunneqassapput. Tamatumalu kingorna kommunalbestyrelsip septembarip ulluisa aallaqqaataanni ataatsimiinnerani oqallisigisassaassalluni.

- Tassani soorunami eqqartorneqassaaq uuma inernerata isikkua, kisianni maannakkut taama isikkoqarallartillugu peerneqarnissaa innersuunnanngilaq, borgmesteri oqarpoq.

Kommunip eqqaassutissaq akisussaaffigaa. Taamaammat eqqaassutissaq nuutsinneqassanersoq kommunalbestyrelsimi ilaasortat aalajangersinnaavaat. Nuutsinneqarnissaanulli pilersaaruteqartoqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat