Borgmesteri anigueqqalaartoq

Ilulissani borgmesteri Anthon Frederiksen ippassaq immikkut ittumik kommunalbestyrelsi ataatsimiimmat tatiginninnginnermik tunineqarpoq, tatiginnikkunnaarnerlu aningoqqalaarlugu.

Ilulissat kommunalbestyrelseani illuatungiliuttup Siumumeersup, Johanne Olsen-ip, borgmesteri tunuaqquvaa. Ilulissat Eqqartuussiviani septembarip 23-ani kommuni 4,2 millioni koruuninik taasiisussanngortitaanera toqqammavigalugu tunuaqqusilluni.

Kommunip eqqartuussivimmut tunniunneqarnerami oqaaseqarnissaminut sapaatip akunneri sisamat periarfissarisimavai atorsimanagilli. Eqqartuussinermilu kommunimit najuuttoqanngimmat pineqaatissiissoqarpoq.

Siumumi ilaasortat arfinillit tatiginnikkunnaarnermik oqaaseqaataat Kattusseqatigiinni ilaasortat IA-milu ilaasortat katillutik arfineq-marluk taasineratigut atortussaatinneqanngillat.

- Anthon Frederiksenip eqqartuussisoqartussaasoq nalunngilaa. Kommunalbestyrelsili aningaasaqarnermullu ataatsimiititaliaq ilisimatinngilai. Eqqartuussisoqarmallu sapaatip-akunnerini sisamani oqaaseqarnissaminut piffissarititaq eqqummaariffigisimanagu, Johanne Olsen oqarpoq.

- Taassuma saniatigut teknikkimut immikkoortortaqarfik piffissaagallartillugu qisuariarsimannginnerarlugu pisuutippaa. Suliassarli taama angitigisoq kommunimi akileraartartunut millionerpassuarnik naleqartussaavoq. Johanne Olsen erseqqissaavoq.

Borgmester Anthon Frederiksen arfininngormat oqarpoq Nunatsinni qinersisoqaleriarmat suliassat aatsaat qaqinneqartut, tamannali Johanne Olsenip ilumuunnginnerarpaa.

- Borgmesteri Siumukkormiuugaluarpalluunniit taamaaliorsimassagaluarpugut. Johanne Olsen akivoq.