Borgmesteri Ane Hansen angerlarsimaannaqqusaasoq: Akissutissat suli utaqqivagut

- Upalungaarsimanissaq pillugu akissutersinissatta tungaanut angerlarsimaannarallassaagut.

Kommune Qeqertalimmi borgmesteri, Ane Hansen (IA), kommunip Facebookimi qupperneratigut oqarpoq.

Taanna maanna ataatsimiigiarnermini Nuummiippoq. Ataatsimiinneq ippassaq pingasunngornermi ingerlanneqarpoq. Ane Hansenilu nakorsaanermit Aasianni tunillatsissimasumik uppernarsaasoqartoq ataatsimiinnermini nalunaarfigineqarpoq.

- Tunillatsissimasup qanigisaa suleqatitsinnut ilaavoq, borgmesteri oqarpoq.

- Pisunut tamanut malinnaavugut, Tunillatsissimasumut qanigisaasoq tunillatsissimanersoq tunillatsissimannginnersorluunniit maanna utaqqivarput, neriuppugullu tunillatsissimassanngitsoq.

Ane Hansen Aasianni tunillatsissimasoqalerneranut atatillugu kommunerisamini killilersuinernik aallartitsivoq:

- Iluamik paasisaqarnissatta tungaanut immikkut iliuusissat aallartipput ukuusut: Utoqqaat Illuat nalinginnaasumik pulaarfigineerukkallassaaq, aamma suliffeqarfiutitta iluani assigiinngitsunilu upalungaarsimanissaq pillugu maleruagassat eqqumaffigineqaqqissaarnissaat kissaatigivarput. Tassa errukulaarneq, quersorniaraanni tallimut quersorneq,

- Pisiniarfimmiikkaanni 2 meterimik ungasinnerusoqassasoq eqqumaffigineqarussasoq piumasarivarput.

Borgmesterip kommunimi innuttaasut mianersorlutillu paarilluarnissaat kaammattuutigaa.

Europami tunillaassuuttoqarneruleqqavoq, taamaammallu sukannernerusumik killilersuisoqartariaqartoq borgmesteri isumaqarpoq:

- Coronamik tunillatsissimasup ilaqutai tamarmik aamma angerlarsimaffimminniiginnarallarput.