Borgmesteri: Aalisakkeriviup matunissaa assut ajuusaarnarpoq

Royal Greenlandip aalisakkanik tunisassiorfiata Narsamiittup matuneqarnerata kingorna, naalakkersuisut aamma Kommune kujalleq aalassassimaarput. Imaammat Kommune Kujalleq aalisakkeriviup matunissaanik siumut paasitinneqarsimanngimmat.

Aalisarnermut Naalakkersuisup Ane Hansenip Royal Greenland siusinnerusukkut paasissutissiisaqqullugu inappaa:

- Inassuteqarfigaakka Kommune Kujalleq pisunik piaartumik nassuaateqarfigineqassasoq, siunissarlu qaninnerusoq pillugu pilersaarutaat paaserusussimavakka, Ane Hansen oqarpoq.

Kommune Kujallermi borgmesterip tusakkani assut ajuusaarutigaa:

- Ajuusaarnaqaaq Narsarmiut pakatserujussuarsimassapput inuuissiornerminni taamak tunineqarnerminni. Kujataani suliffissaaleqisoqarpoq, amerleriarnissaallu kingunerissallugu. Nalunngilarput Narsami fabrikki ingerlalluarmat Narsarmiut sulilluarlutik pinikuusut, taamatut periarfissinneqarnissartik kissaatigaat, Simon Simonsen oqarpoq.

Narsami aalisakkanik tunisassiorfiup matuneqarnera nutaanik ingerlatserusuttunik ammaassisinnaavoq.

- Neriuppunga fabrikkip ingerlaannarnissaannik iliuuseqaqatigiissasugut pilersaarusioqatigiilluta. Namminersortut aalisakkerivimmik tiguserusupput, neriuutigaaralu Naalakkersuisut Royal Greenlandilu namminersortut ammaannissaannik suliniuteqassasut, Simon Simonsen oqarpoq.

Ane Hansenip Royal Greenland ullaap tungaani naapeqatigiinnermi ilisimatippaa Narsami aalisakkerivimmut pilersaarutaasut piaartumik paasissutisineqassasut:

- Narsamut tunngatillugu namminersortunik ingerlatseruttunik soqutiginnittoqarmat, pilersaarutaat paaserusullutigit ilisimatippakka, ingerlatserusullutik saqqummiussisimasut periarfissaat pitsanngorsarneqarniassammata, Ane Hansen oqarpoq.