Borgen nuannarineqarlunilu pikkunaagineqarpoq

Danmarkip Kalaallit Nunaannut attaveqarnera immikkoortumi tassani sammineqarneruvoq.

Isiginnaartitsisartoq nipilersortartorlu, Angunnguaq Larsen, kalaallini pingaarnertut inuttaavoq, tassa Naalakkersuisut siulittaasuusaarami.

Aviisimi Ekstra Blademi filminik naliliisartup, Kristine Krefeldtip, oqarnera naapertorlugu, immikkoortoq ippassaq aallakaatinneqartoq, maannamut nuannernerpaajuvoq. Pingaartumik nuannaarutigaa Danmarkip Kalaallit Nunaannut attaveqarnera pineqarmat.

- Taama kusanartigisumik misigissuseqartigisumillu takutitsisoqaraangat, aliikkusersuineq nalinginnaasoq immikkuullarissisarpoq - imarisaa tangeqalersarpoq - uagullu immaqa silatunerulersarpugut, Kristine Krefeldt allappoq, Borgenillu immikkoortuisa sisamaat tallimanik ullorialerlugu, ullorissat arfinillit tunniunneqarsinnaapput.

Aviisi B.T. aamma naliliivoq. Immikkoortut sisamaat filminik naliliisartup James Kristoffer Miles Dommenip marlunnik ullorialerpaa. Taannalu allappoq "Borgen er helt til slædehundene".

Angunnguaq Larsen naliliinerni taaneqanngilaq, Facebookimili nersualaarneqaqaaq, arlallillu allapput Angunnguup peqataaneratigut kalaaliunertik tulluusimaarutigigitsik.

Isiginnaartitsisartorlu inuusuttoq taanna nuannarinnnittaasa ilaata nutaanik ima atsersimavaa: Angunnguaq Banderas De Niro Stallone Schwarzenegger Larsen.