Bootcampip tullissaa ingerlatseqatigiiffiup pilersinneqaqqammersup akisussaaffigissavaa

Bootcampip siulliup ingerlanneqarneranut atatillugu Palle Christiansenip suliamik ingerlatsisimanera isornartorsiorneqartupilussuuvoq. Aaqqissuisut nunanit allaneersuunerat ilaatigut isornartorsiorneqarpoq. Tamatumuuna taamaattoqassanngilaq.

-Bootcampinik iluatsilluartumik ingerlatsinitta, inuusuttunut ilinniartitaanerup avataaniittunut iluaqutaasussamik nuannaarutaasussamillu nanginneqarnissaa nuannaarutigisupilussuuara. Bootcampimi siullermi, misiligutitut suliniutaasumi, angusavut pitsaasupilussuupput. Tassunga atatillugu Nunatsinni suliffeqarfiup suliariumannittussarsiuussinerup naammassineqarnerani bootcampip tullissaanik ingerlatsisussatut piukkunnarnerpaajunera soorunami iluarisimaartupilussuuara, Palle Christiansen naqissusiivoq.

Suliariumannittussarsiuussineq soqutigineqarpallaarsimanngilaq. Soqutiginnittut marluupput, ingerlatseqatigiiffillu  pilersinneqaqqammersoq, Motzfeldt og Grødem I/S, toqqarneqarluni. Tamanna Namminersorlutik Oqartussat tungaannit misiliiinertupajaaq isikkoqarsinnaavoq, Palle Christiansenili tamatumunnga isumaqataanngilaq.

-Naalakkersuisoqarfik suliariumannittussarsiuussinermut atatillugu neqerooruteqartut suliassamik isumaginninnissamut pisariaqartunik piginnaasaqarnerlutik uppernarsarsinnaaneraat nalilersuiffigisimavaa. Naalakkersuisoqarfiup suliariumannittussarsiuussinermi ajugaasup piginnaasai tatigivai, naak nunatsinni suliffeqarfiit matuminnga suliakkerneqartut siullersarigaluaraat, taamaattumillu siornatigut taamatut suliaqarsimanermik misilittagaqarnermut takussutissaqanngikkaluartoq, Palle Christiansen knr.gl-imut nassuiaavoq.

2013-imi bootcampimik allamik ingerlatsisoqarnissaa aamma pilersaarutaavoq, taannalu Nuummi ingerlanneqassanngilaq. Bootcampilli taassuma pilersaarusiorneqarnera suli iluatsivissorsimanngilaq.

- Bootcampip tulliata sumi ingerlanneqartussatut kissaatigineqarnera pillugu soqutiginnittunik Naalakkersuisoq oqaloqateqarpoq. 2013-imi Bootcamp nr. 2-p Nuummi inissisimatinnagu allami ingerlanneqartussanngorlugu suliariumannittussarsiuussisoqarnissaata kissaatigineqarnera uppernarsarneqarpoq. Suliariumannittussarsiuussinerup taassuma 2013-imi upernaakkut ingerlanneqarnissaa naatsorsuutigineqartoq, Ilinniartitaanermut Nunanilu avannarlerni suleqatigiinnermut Naalakkersuisup Palle Christiansenip oqaatigaa.