Bonuspointit ajunngitsorsiassatut isigalugit atorluarneqaqaat

Timmisartuutileqatigiiffiit ilaasunut tamanut bonuspoint-it tunniuttagaat, katersorlugillu akeqanngitsumik angalassutaasinnaalersartut, qinikkanit pisortanilu atorfilinnit sulinermut atatillugu angalasartunit privatimik atorluarneqaqaat.

Partiip naalakkersuisuutitaqartup Siumut-p ukiut sisamat matuma siornatigut isumaqatigiissutigisimagaluarpaa, bonuspoint-it akileraartartut akiligaannik angalatilluni katersukkat sulinermut atatillugu angalanernut taamaallaat atorneqartassasut imaanngitsorlu ajunngitsorsiassatut isigalugit privatimik atorneqartassasut.

Maannali susoqarnani ukiut sisamat qaangiussimalermata allanngortinnissaa piffissanngortoq, Demokraatit siulittaasuata tullia Palle Christiansen isumaqarpoq.

- Bonuspoint-it Namminersornerullutik Oqartussanut tunniunneqartartussaagaluarput, tassalu inuiaqatigiinnut. Palle Christiansen oqarpoq.

Bonuspoint-itillumi naleqaqaat. Air Greenlandip timmisartorsuani akisunermut ilaalluni siumut utimullu Atlantiku qulaakkaanni point-it 8800-t katersorneqartarput, marloriarlunilu siumut utimullu taama timmisartoraanni bonuspoint-it ima amerlatigilersarput, allaat Københavniminngaannit Europami nunat arlaannut akeqanngitsumik angalasoqarsinnaalerlunilu hotelimi sivikinnerpaamik unnuk ataaseq unnuisoqarsinnaalertarpoq.

Maannamut oqaatigiuminaappoq, bonuspoint-it qassit angalanermut atatillugu ukiup ataatsip ingerlanerani katersorneqarsimanersut. Namminersornerullutilli Oqartussat angalanernut ukiumut 50-60 million koruunit missaanniittut atortarpai. Taakku saniatigut kommunit pisortallu suliffeqarfii allat aamma angalatitsisarput. Naalakkersuisut tulleriiaarlugit paasiniaavigigaanni paasinarpoq, amerlanerpaartaat bonuspoint-inik namminneq atugassaminnik katersisartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat