Bonusit annaasaqaataapput

Naalagaaffiup akileraarutitigut isertitassaralui qanoq amerlatigisut isertinngitsoorneqartarnersut Danmarkimi akileraartarnermut ministerip, Kristian Jensenip, passerusuppaa. Timmisartunut bonusisiat akileraarutinut nammineerluni immersuiffissamut nalunaarsorneqartannginnerat annaasaqarnermut pissutaavoq.

Ministerip akileraartarnermut qullersaqarfik misissueqqullugu qinnuigisimavaa:

- Angalatitseqatigiiffiit timmisartunut bonus-it tunniuttagaat pillugit nalunaaruteqanngitsoortoqartarsimasoq tusatsiarneqartarpoq tamannalu unitsikkusupparput. Ajoraluartumik suliamut assingusumik malitassaqanngilagut. Taamaattumik suliffeqarfiit annerusut ataasiakkaarlugit misissuiffigineqassapput, paasiniarlugu aningaasat qanoq amerlatigisut nalunaarutiginngitsoorneqartarsimanersut. Tamanna ilisimalerutsigu qanoq periaaseqassanerluta paasisinnaalissavarput, Kristian Jensen oqarpoq.

Ukiup tulliata ingerlanerani Akileraartarnermut Qullersaqarfiup misissuinini naammassissagaa naatsorsuutigineqarpoq.

Akileraartarnermut malittarisassat maani assingupput. Suliffimmut atatillugu timmisartumut bonusinik katersisimagaanni namminerlu angalanermut atorlugit, - taava isertitatut akileraaruteqaataasussatut b-tut isigineqassapput. Tassa bonusit katersat atorlugit feeriarniarluni angalagaanni, aatsaat tamanna akileraartarnermut qullersaqarfimmut nalunaarutigineqassaaq – katersinerup nalaani nalunaarutigisariaqanngillat. Nunatsinni akileraartarnermut pisortaqarfiup pisortaa Kaare Hagemann taama ilisimatitsivoq. Maanili misissuinissamik pilersaaruteqartoqanngilaq. Inuimmi tamarmik akileraaruteqanngitsunik killilinnik b-tut isertitaqarsinnaapput. Taamaattumik misissuinissap imminut akilersinnaanissaa ilimagineqanngilaq.