Bonusit ajunngitsorsiassatut atortarpaat

Timmisartumik angallannermi timmisartuutileqatigiiffiit atuisunut bonuserititaat, katersorlugit akeqanngitsumik angalassutaasinnaasut, qinikkanit pisortanilu atorfilinnit sulinermut atatillugu angalasartuni namminneq atorluarneqaqaat.

Ajunngitsorsiat tamakku akileraaruseriffimmut nalunaarutigineqaraangamik inatsisinik unioqqutitsinertut nalilerneqarneq ajorput, aningaasarpassuarnillu naleqarput.

Nunarsuarmi timmisartukkut angallanernut atatillugu, timmisartuutileqatigiiffimmik atuisimanermut ajunngitsorsiat, bonusit, angalanerit naapertorlugit katersoraanni akeqanngitsumik angalassutaasinnaasut assigiinngitsorpassuupput, taakku ilaat Eurobonus Namminersornerullutik Oqartussani atorfilinnit qinikkanillu pissarsiarineqartarput.

Qinikkani naalakkersuisut Jens Napaattooq, Johan Lund Olsen, Henriette Rasmussen kiisalu Asii Chemnitz Narup Eurobonusimut ilaasortaapput.

Eurobonusimut ilaasortat pisortat akiligaannik Imarpik qulaallugu timmisartornitik tamaasa imaluunniit SAS-ip timmisartuutaanik atuinitik tamaasa Eurobonusip pointiinik pinnattarput, taamatuttaaq pisortat akiligaannik SAS-ip akunnittarfiutaani unnuisimagunik, biiliutaanilluunniit attartorsimagunik aamma pointennassutigisarlugit. Angalanerup kimit akiligaanera Eurobonusip pointinnatitsinermini apeqqutaatinneq ajorpaa.

Qinikkanut pointannalluartartunut ilaavoq angallannermut naalakkersuisoq Jens Napaattooq, tusarfiit tutsuiginartut naapertorlugit Jens Napaattooq Eurobonusimut siorna juunimi ilaasortanngorsimavoq, taamanerniillu Imarpik ikinnerpaamik qulingiluariarluni billitsi akisuneq atorlugu qulaassimallugu. Angalanerit taakku Eurobonusimit 80.000-it missaanni pointennassutigisimallugit. 80.000 pointit angalanernik akeqanngitsunik qassinimmita naleqarpat, tamanna SAS-imi tuniniaanermut pisortamut Jens Aaløsemut paasiniarparput:

- 80.000 pointet atorlugit Europami ornitassat assigiinngitsut sisamat akeqanngitsumik orninneqarsinnaapput. Taakkulu immikkut tarmarmik 20.000 kronenik naleqarput. 80.000 pointit atorlugit akeqanngitsumik kangianut soorlu Bangkokkiliartoqarsinnaavoq, 60.000 pointillu atorlugit akeqanngitsumik USA-liartoqarsinnaalluni.

Pointillu akeqanngitsumik aamma hotelimiissutaasinnaapput, tassani hotelini akimarnit inaaniinneq angalanertalik 80.000 pointinik naleqarpoq Jens Aaløse oqarpoq.

Nunatsinni pisortat akiligaannik angalasartut qassit Eurobonusimik qanoq amerlatigisunik pissarsisarneri ilisimaneqanngilaq. Danmarkimi aaqqissuussineq alla atuuppoq, bonusit pisortanut tunniuttarnerisigut pisortat angalatitsinerannut atorneqartarlutik.

Naalakkersuisut siulittaasuat Hans Enoksen bonusinik atuisuunngilaq, nammineq oqarnermisut, akileraartartut akiligaannik feriarnissi pissusissamisoorsorinnginnamiuk.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat