Boliviap præsidentia kimigiiserfigineqartoq tunuartoq
Boliviap præsidentia, Evo Moralesip, tunuarnini sapaatiummat Danmarkimi nalunaaqutaq malillugu unnukkut nalunaarutigaa.
- Præsidentitut tunuarpunga, tv-kkut toqqaannartumik aallakaatinneqartumik oqalugiarnermini oqarpoq.
Qinersinermi inernerusut pisortatigoortumik saqqummiussat naapertorlugit Moralesip ajugaaneranik kinguneqartumik præsidentimut qinersinerup assortuussutaasup kingorna sapaatit-akunnerini pingasuni akerliussutsimik takutitsilluni eqqissiviilliornerit pissutigalugit tunuarnerarpoq.
Aallaqqaataanilli qinersinermi inernerusut nalunanngitsumik allanngortiterneqarsimasut Amerikap Naalagaaffiisa Kattuffiata nalunaarusiaani isummiunneqarpoq.
Pissutsit allanngulertupallapput, Moralesimummi tapersiisut piffissap ingerlanerani ikiliartornerisa ilutigisaannik Boliviami ministerit qaffasissumillu atorfillit arlallit atorfimminnit sapaatiummat tunuarmata.
Morales tunuarniarluni Boliviami inuiaqatigiinnut nalunaaruteqanngitsiartoq Boliviap sakkutuuisa naalagaanertaata, Williams Kalimanip, præsidentertik tunuarniuteqaqqullugu inappaa.