Indonesienimi Etiopiamilu qaammatit tallimat iluanni ajutoornerni inuit marluk ajunaarsimammata Boeingip timmisartuliai 737 MAX-it marsimili angallassissutaaqqusaajunnaarput.Assi: Mike Blake/Reuters/Ritzau Scanpix

Boeingip timmisartuliai quppanitsitersimasut 50-it angallassissutaaqqusaanngitsut

Boeingip timmisartuliaminik nunarsuarmi tamarmi sumiiffinni assigiinngitsuniittunik misissuinissaminut piumasaqarfigineqareersorlu paasivaa timmisartuliani 737 NG-it 50-ingajaat quppanitsisersimasut.

Timmisartulioqatigiiffik Boeing ilungersuareersoq isumannaallisaanermut tunngasutigut allanik isumakuluutissaqalerpoq.

Boeingip ullumi ataasinngornermi nalunaarummini ilisimatitsissutigaa, maluginiarneqarsimasoq timmisartuliani piumaneqarluartut 737 NG-it 50-it missaat quppanitsitersimasut.

Nutaarsiassaqartitsivik AFP taama allaaserisaqarpoq.

Boeingip timmisartuliani 737 NG-it qassiit quppanitsitersimasut septembarimi paasivaa, tamannalu amerikamiut silaannakkut angallannermut oqartussaasuisa timmisartorpassuarnik taama ittunik nunarsuarmi sumiiffinni assigiinngitsuniittunik misissuisoqarnissaanut piumasaqaateqarnerannik kinguneqarpoq.

AAMMA ATUARUK Boeingimik ajunaartut ilaqutaat akissutisisinnaalerunartut

Boeingip oqaaseqartartuata ilisimatitsissutigaa, timmisartut katillugit 1000-t misissorneqarsimasut, paasineqarporlu taakkunani 50-it missaat quppanitsitersimasut.

Timmisartut atortuisa ilai tuluttut "pickle fork"-imik taaneqartartut quppanitsitersimanerat paasineqarsimasoq Boeingip oktobarimi ilisimatitsissutigaa.

Taanna timmisartup atortuisa ilagisaat timmisartup suluusaanut qajannaarutaavoq. Taannarpiaq timmisartup ajoquteqarani atuuttuarsinnarnerani ajoquteqalertussaajunnaarlugu pilersitaagaluarpoq.

Boeing tamatumunnga atatillugu annerusumik oqaaseqarusussimanngitsoq nutaarsiassaqartitsivik Reuters allappoq.

Skandinaviami timmisartuutileqatigiiffik SAS timmisartunik Boeing 737 NG-inik misissuisussanngortitaanini ilutigalugu oktobarimi misissuinermi paasivaa, timmisartut pigisani katillugit 31-usuni marluk ajoquteqartut.

Timmisartut taakku marluk angallissutaaqqusaajunnaarput.

AAMMA ATUARUK Oqartussat Boeingip timmisartuani assortuussutaasumi ajoqutaasinnaasumik allamik paasisaqartut

Tamanna sioqqutitsiarlugu Amerikami timmisartuutileqatigiiffiup Southwest Airlinesip Brasiliamilu timmisartuutileqatigiiffiup GOL Linhas Aéreasip timmisartutik Boeing737 NG-it katillugit 13-isut quppanitsitersimasut paasivaat.

Boeingip erseqqissaatigaa, timmisartut quppanitsitersimasut timmisartuliatik ilaannut tassa 737 MAX-inut assortuussutaasimasunut attuumassuteqanngitsut.

Indonesienimi Etiopiamilu qaammatit tallimat iluanni ajutoornerni inuit marluk ajunaarsimammata Boeingip timmisartuliai 737 MAX-it marsimili angallassissutaaqqusaajunnaarput.

Timmisartoq Indonisiamut 2018-imi oktobarip qaammataani nakkarmat inuit 189-it ajunaarput.

Timmisartorlu 737 MAX-eq Etiopiamut marsimi nakkarpoq, tassanilu issimasut tamarmik 157-iusut ajunaarput.

Boeingip neriugaa, timmisartut 737 MAX-it 2019-ip naannginnerani silaannakkut angallassissutaaqqilersinnaajumaartut.

AAMMA ATUARUK Boeingip kaaviiaartitai appariapiloortut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat