Bodil Kaalund nersornaaserneqartussanngorpoq
Kalaallit eqqumiitsuliaannut attuumassuteqarluartoq eqqumiitsuliortorlu Bodil Kaalund Ridder af Dannebrogimik nersornaaserneqalerpoq. Namminersornerullutik Oqartussat nersornaasiinissamut inassutiginnittuusimapput. Bodil Kaalundip nunatsinnut 1968-imilli tikinnerminit nunatsinni eqqumiitsulioriaaseq siammartertuarsimammagu nersornaasigassatut inassutigineqarpoq.
Eqqumiitsulianik katersugaasivimmi Louisianami kalaallit eqqumiitsuliaasa siullermeerlutik saqqummersinneqarnerat Bodil Kaalundip ilaatigut suleqataaffigisimavaa. Nuummi eqqumiitsuliortut sulliviannik kingornatigut eqqumiitsuliortut ilinniarfigiligaannik pilersitseqataasimavoq, taakku saniatigut atuakkat ”Grønlandsk Kunst”, Aalut Kangermiu kiisalu ”Qaamarngup qalipaasua eqqumiitsuliortoq Hans Lynge” pillugu atuakkiaq saqqummersissimallugit.
Hans Lyngep, Jens Rosingip eqqumiitsuliortullu allat aqqaneq-marluk suliaat Lemvigimi katersugaasivimmi, Museet for Religiøs Kunst-imi, arfininngorpat saqqummersinneqassapput. Tunumiut eqqumiitsuliaat aamma Bodil Kaalundip upperisaq aallaavigalugu eqqumiitsuliai saqqummersinneqassapput, Bodil Kaalundip novemberimi 75-inik ukioqalernissaa malunnartinniarlugu ”Nordenvind”-imik taaguutilik saqqummersinneqassaaq.