Bloomberg USA-mi præsidentinngorniuttussatut tunuartoq

Michael Bloombergip Joe Biden præsidentinngorniunnissamut sassarneranut tapersersorpaa.

Nutaarsiassaqartitsivik Bloomberg taama allappoq.

Milliarderpassuarnik aningaasaatillip nunarsuarmilu pisuujunerpaat ilaata, Michael Bloombergip, nammineq aningaasaaterpassuani ilarpaalui qineqqusaarnerminut aningaasaliissutigai.

Taamaakkaluartoq Amerikami demokraatit præsidentinngorniunnissamut sassartitassaannik nunap ilaanni qulini marlunngornermi qinersinersuarmi angusarissaanngilaq.

AAMMA ATUARUK Bloomberg demokraatit tv-kkut tulliani oqallinneranni peqataassasoq

USA-mi præsidentimut tullersortaasimasoq Joe Biden, Vermontimi guvernøri Bernie Sanders Massachusettsimilu senatori Elizabeth Warren taamaalillutik demokraatit præsidentinngorniunnissamut sassartitaannik qinersinermi siuaqqalerput.

Bloomberg marlunngornermi qinersinissarsuaq aatsaat nallingajalermat iluamik qineqqusaaqataalerpoq, nalinginnaanngitsumillu qineqqusaariaaseqarluni.

Qineqqusaarnerup naajaartornerani aatsaat akuliuppoq, aamma Californiamit Texasimillu inoqarluartunit marlunngornermi marsip ulluisa pingajuanni qinersinersuarmut taperserneqarluarnissani annerusumik anguniarsimallugu. Demokraatilli præsidentinngorniunnermut sassartitaat Iowami New Hampshiremilu qineqqusaarmata peqataanngilaq.

Bloomberg qineqqusaarnermini 300-nit amerlanerusunik Californiami sulisoqarpoq.