Blok P-mi toqutsisoq ukiuni pingasuni parnaarussaassaaq
Pineqarpoq Nuummi inissiarsuit ilaanni blok P-mi 62-inik ukiulimmik toqutsineq - siorna 4. aamma 5. novembarip akornanni unnuami pisoq.
Angut 47-nik ukiulik toqutsisimasutut pineqaatissinneqarnermi saniatigut aamma persuttaanernut tillinniarnernullu arlalinnut tunngatillugu pisuutinneqarpoq.
Angutip toqutsisup sivikinnerpaamik ukiuni arfinilinni pineqaatissinneqarsimasunut inissiisarfimmiinnissaa unnerluussisussaatitaasut piumasarigaat, illersuisup 47-nik ukiullip ukiumi ataatsimini nakkutigineqarnissaa imigassartornerminullu katsorsartinnissaa siunnersuutigalugu.
Nuup Eqqartuussiviani ullumi aalajangerneqarpoq angut ukiuni pingasuni pineqaatissinneqarsimasunut inissiisarfimmiittussanngortitaassasoq. Taamatut aalajangerneq illersuisup unnerluussisussaatitaasullu akuerissanerlugu ingerlateqqissanerluguluunniit eqqarsaatigeqqaarusuppaat.
- Eqqartuussut atuarluaqqaarlugu ullut 14-it tulliuttut ingerlaneranni eqqartuussivimmut qulliunerusumut suliassanngortissanerlugu eqqarsaatigissavarput. Tungaanullu angut 47-nik ukiulik tigummigallagaassaaq, politimesteriugallartoq Bjørn Bay oqarpoq.
Teknikkikkut misissuinerit takutippaat angut 62-inik ukiulik niaqqumigut arlaanik manngertumik anaaneqarnermi kingunerisaanik toqusimasoq.
Toqutsineq ernguttoqarnernerani angutit pingasut najuutsillugit pisimavoq. Angutit pingajuat nipiliortoqarneranik iterluni politiinut taamani kalerriivoq.
