Blok P-mi toqutsineq suli misissuiffigineqarpoq

- Misissueqqissaarnerput pissutigalugu suliaq pillugu suli oqaaseqarusunngilavut, Politiit unnerluussissuserisuat Henrik Pass oqarpoq.

Angut 40-kkunni ukiulik inatsit tunngaviusut naapertorlugit killisiorneqareerluni toqutsisutut pasineqarluni novembarip arfernanni tigummigallarneqalerpoq, sulilu oqaatigineqarsinnaanngilaq tigummeqartoq toqutsisuusimanersoq.

- Angut pasineqarnerminut tunngatillugu qanoq isumaqarnersoq oqaaseqarsinnaanngilanga, Henrik Pass oqarpoq.

Danmarkimi Politiit pinerluttoqarsimatillugu misissueqqissaartartui suliamut tunngatillugu aamma suleqataapput.

- Misissueqqissaarnermi suliassat suli amerlapput, Henrik Pass oqarpoq.

Toqusimasut timaannik misissuisartup angutip 62-inik ukiullip timaa misissoreerpaa, misissuereernermilu nalunaarusiaq politiinit pigineqarpoq.

- Misissuisartup toqqutaasoq pillugu paasisaqassalluni toqusup timaa misissuiffigaa, nalunaarusiarli pillugu annerusumik oqaaseqarusunngilanga, Henrik Pass oqarpoq.

Suliap killiffia tassa imaappoq, angut 40-kkunnik ukiulik toqutsisimasutut pasineqarluni tigummigallarneqarpoq.