Blok P-mi toqutsineq pillugu eqqartuussineq aallartippoq
Nalunaaqutaq 13.48 nutartigaq
Nuummi toqutsisimaneq alla Nuummi Eqqartuussiviup ullumi aallartippaa.
Tamatumani pineqarpoq blok P-mi 62-inik ukiulimmik toqutsineq - siorna 4. aamma 5. novembarimi unnuami pisoq.
Angut 47-nik ukiulik toqutsisimasutut pasineqarpoq, toqutsinerlu teknikkikkut misissuinerit naapertorlugit arlaanik manngertumik anaasinikkut pisimalluni.
Ulloqeqqata siornagut eqqartuussisut ataatsimiinneranni paasineqarpoq toqutsineq ernguttoqarnernerani angutit pingasut najuutsillugit pisimasoq. Toqutsineq inip iluani pingajuusumit najuuffigineqarpoq, taanna uitsattoqarnerani itersimammat namminerlu pasineqartumit savimmik qunusaarneqarsimalluni.
Toqutsinermut suna pissutaanersoq ulloqeqqata siornani eqqartuussisut ataatsimiinneranni suli paasinarsinngilaq, aalajangiusimaneqarlunili sivikinnerpaamik ukiuni arfinilinni pineqaatissinneqarsimasunut inissiisarfimmiinnissaq unnerluussisussaatitaasut piumasarigaat, illersuisulli 47-nik ukiullip nakkutigineqarnissaa imigassartornerminullu katsorsartinnissaa siunnersuutigalugu.
Toqutsinerup saniatigut 47-nik ukiulik nakuuserternerminut tillinniartarnerminullu arlalinnut unnerluutigineqarpoq, angulli pinngitsuunerarluni.
Eqqartuussummik suliaq aqagu nangeqqinneqarssaaq pingasunngorpallu eqqartuussisoqarnissaa ilimagineqarluni.
