Blok P-mi najugallit ilaasa Nuup qinngua nuuffigerusunngilaat
Blok P-mili najugallit oqaloqatigisavut illoqarfiup qinnguanut nuunnissartik orniginartinngilaat.
- Ullaaralaakkut suliartortarama Qinngutsinnut nuukkusunngilanga, maanngaanniillu suliffinnut qanimmat illoqarfimmi najugaqarnissarput orniginartinneruara, Regine oqarpoq, nuunnissartillu pillugu INI A/S-imiit siunnersorneqarnissartik ujartorlugu:
- Siunnersorneqarnissarput ujartorparput. Piaarnerpaamik siunnersorneqarnissarput ujartorparput, tusatsiakkat tunngaviginagit, iluamik paasitinneqarluta siunnersorneqarnissarput kissaatigalutigu, oqarpoq.
Nuup qinnguani initaartik aamma pisiarisinnaassavaat, akissaqannginnertilli Reginap ajuusaarutigaa:
- SIK malillugu akissarsiaqartuusugut nalunngilarput inissiat nutaat qanoq akisutiginersut. Pisiarissagutsigu akissaqartikkunngilarput, Regine oqarpoq.
Blok P-mi najugalik alla, Kulunnguaq Jensen, katillugit ukiuni 15-ini Blok P-mi najugaqarnikuuvoq, Nuullu qinnguani inissiat nutaajummata tassani najugaqalernissaq pilerigisinnaagaluarlugu. Qinnguaninngaanniilli illoqarfiup qeqqanut ungasippallaarnerarpaa:
- Nutaaqqissaajummata pilerinarpoq, kisianni akissaa ungasinneralu aporfigivakka. Illoqarfimmi najugaqarneq sungiusimallugu iluarinerugakku, Kulunnguaq Jensen oqarpoq.
Kulunnguup inissiarsuaq ussiitsuunerarpaa, nipiliorfioqisorlu, nuunnissani taamaattumik qilanaaraa.
Nina Bianco blok P-mi aamma najugaqarpoq. Aappaqarpoq, pingasunillu meeraqarlutik.
Taannattaaq inissiarsuaq ussiitsuunerarpaa, illoqarfimmilu najugaqarnissaq orniginartinnerullugu.
Inissiamut nutaamut nuussagaluarunik aamma akisussanerarpaa:
- Manna akisoreermat ajornarpasippoq, aamma qanoq akeqassanersoq suli paasitinneqanngilagut, siunnersorneqarnissarpullu kissaatigaarput, Nina Bianco, Nuummi inissiarsuarmi blok P-mi najugalik oqarpoq.