Blok 17-imi toqutsineq pillugu suliami unnerluussaasut politiinit ilisimaneqarluarput
Eqqartuussineq ippassaq ullup qeqqata kingorna aallartimmat, inuusuttut pingasut pinerluutigisimasaat assigiinngitsut 28-t pillugit unnerluussaapput. Tillinniarnerit ujajaanerit persuttaanerillu pillugit unnerluussaapput, tamakkualu ilaat pipput toqutsinermut atatillugu tigummigallagaanerminni.
Unnerluussutip allassimanera malillugu, inuusuttut pingasut taakkua ilungersunartunik aqqusaagaqarput, arlaleriarlutillu politiinit tigusarineqartarput.
Blok 17-imi toqutsinermut tunngasut saniatigut unnerluussissutit 28-t eqqartuussivimmi aalajangiiffigineqassapput.
Blok 17-imi toqutsineq sioqqullugu pinerluutigineqartut arlaqarput aamma toqutsinerup kingorna tigummigallagaanerminni pinerluttuliorsimallutik.
Inuusuttut pingasut nukarlersaat 17-inik ukiulik Qaqortumi Nipinngaami niuertarfimmi Sparimi siorna novembarip qaammataani ujajaasimasutut unnerluussaavoq.
Tassalu angut 17-nik ukiulik ujajaanermi peqatavoq angutip 26-nik ukiullip toqutaaneranit qaammatit tallimat qaanngiummata.
Angutit allat marluk peqatigalugit kiinnatik asserlugit kaattamik inngigissumik qunusaaruserlutik niuertarfimmi Sparimi pisiniartitsisut qunusaarneqarput, aningaasat 5.650 kr tigoriarlugit niuertarfik qimappaat.
Angut 17-inik ukiulik Sisimiuni paaqqinnittarfimmi Qasapermiuni inissinneqarnermini Qasarpermiuni nakkutilliisutut atorfilik sioorasaarpaa, tamannalu pivoq toqutsineq qaammatinik sisamanik sioqqullugu.
Nakkutilliisutut sulisutut atorfilik saviminermik nuugissumik tigumiarluni sioorasaarpaa aningaasaasivik ammaqqulugu.
Tamannali iluatsinngilaq, nakkutilliisutut atorfilik aningaasaavimmut matuersaateqanngimmat.
Unnerluussissutip allasimanera malillugu angutip 17-inik ukiullip savimmik 10 centimeterisut takitigisumik qunusaarutilerluni nakkutilliisutut atorfilik peqquaa matu ammaqqullugu, tamannali aamma iluatsinngilaq paaqqinnittarfimmi sulisup matuersaat eqqortoq tigumminngimmagu.
Angutip 16-inik ukiullip nakkutilliisutut sulisoq qunusaarpaa, taassuma aningaasaatini 150 kr.-it, sikaratsit poortaq ataaseq, oqarasuaatit angallattakkat marluk, sim-kortilu ataaseq tunniullugit.
Toqutsinermut atatillugu eqqartuussinermi ullumi pisunut uterutta. Uani nakorsat eqqartuussissunut siunnersuisartut unnerluutigineqartut tarnimikkut missuiffigineqarnernerisa inernerat unnerluussisumit saqqumiunneqarput.
Toqutsisutut unnerluutigineqartup 20-nik ukiullip tarnimigut missisuiffigineqarnerata inernera ullumi eqqartuussinermi saqummiunneqarpoq. Misissuineq Århusip Universitethospitaliata tarnimikkut nappaateqartut immikkoortortaqarfiani Risskovimiittumi nakorsanit suliarineqarpoq.
Tarnimikkut nappaateqartut nakorsaat misissuinneq naammassigamikku innersuussutigaat, angut 20-nik ukiulik eqqarsartaatsimigut pissusilersornermigullu niaqulaartutut malunnartorsiffigineqanngikkaluarluni avatangiisiminut naviartulersinnaanera pillugu, Danmarkimi tarnimikkut nappaateqartut katsorsarfiannut inissinneqarnissaanik pineqaatissinneqarnissaa nakorsat innersuussutigaat, tassalu angummut 26-nik ukiulimmut toqutsisimasutut pineqaatissinneqarpat.
Tarnikkut misissuinermi angut toqutsisimasutut unnerluussaasoq soqutigittaatsutut, ammip qalipaataanik immikoortitsisartutut, imminut pingaartitsisutut, kamajasutut peqqarniissinnaasutut, taamattorli eqqarsartaatsimigut nalinginnaasumik eqqarsartartutut nakorsat nalilerpaat.
Angut 19-inik ukiulik toqutsineq sioqqullugu persutaanermi peqataasimasutut unnerluussaasoq aamma tarnikkut misissorneqarpoq.
Angut taanna ukiuminut naleqqiulluni inerisimmanngilaq. Nammineq qanoq iliuuseqarnissamut suliniuteqarneq ajorpoq Kalaallit Nunaannilu pinerluttunik isumaginnittunit oqaatigineqarpoq ingerlaqqinnissaanut inersimasumik tapersersorteqartariaqarpoq.
Taassuma pineqaatissineqarnissaa akornutissaqanngitsoq tarnikkut misissuinermi erserpoq.
Angut 19-nik ukiulik inuit akornanniissinnaanera akornuteqarsinnaasoq, tarnikkut misissuinerit aallaavigalugit unnerluussisut saqqummiussineranni erserpoq.
