Blairip atuakkiaa saqqummerpoq

Tony Blairip atuakkiaa 700-nik quppernilik taaguuteqarpoq "A Journey" - "Angalaneq". Ministeriunertut kingoraartinilu Gordon Brown akunnerminni silaannaq qanoq ajortiginersoq sukumiisumik takeqisumillu allaaseraa.

Tony Blairip Gordon Brown tassaanerarpaa inuk "naalliunnartoq" "misigissuseqanngitsorlu".

- Brownip nunamik aqutsisinnaanera inuppassuit ingasaallugu taamani takorloorpaat, isumali tamanna kingorna allanngorpoq, inuppassuit ilippagiunnaarpaat, Brownimi analytikeriuvoq pikkorissoq, Tony Blair oqarpoq, aamma oqarluni, partii Gordon Brownip ajalusoortikkumaaraa ilisimareersimagini.

Atuagaq pikkunartunik allanik aamma imaqarpoq. Tassami ministeriunertut suliaminut tamaviaarnaqisunut angummanniarnermik imigassartornera annertusiartuinnarsimavoq.

Siuttutut sulisimagaluarluni uukapaatitsiniartutut qunutuutullu imminut taagorpoq.

Irakimi sorsuttoqarnerani toqutaasorpassuit aliasuutigisimanerarpai, sulili utoqqatserumanani.

- Sorsunneq tamaat akisussaaffigaara, sulilu isumaqarpunga eqqortumik iliorsimalluta, Irakimi toqutaasorpassuit ilaqutaat misiginneqatigigaluarlugit, Irakimut sakkutuuliineq suli tapersersorpara, Blair oqarpoq, atuakkami aamma oqaatigalugu Labourip nutaamik siulittaasortaarnissaa qilanaarigini.

- Siunissaq eqqarsaatigalugu siumut isigiuartariaqarpugut. Inuiaqatigiit 1950-ikkunni pisunut utertinnissaat eqqarsaatigisariaqanngilarput, Blair oqarpoq, Ed Milliband qatanngutaalu niuernerpalaartumik pissuseqarnerusoq David Milliband, Labourimi pissaanermik tiguserusuttut, tassani eqqarsaatigigai malugineqarsinnaalluni.

Danmarkip Radioanit ilanngutassiaq taamaalilluta kalaallisut suliaraarput, -nillu atuarpaa.