Blair ministeriutitaminik soraarsitsivoq

Tuluit Nunaata ministeriunerata Tony Blairip nunap iluani pissutsinut ministeri, nunanullu allanut ministerini soraarsippai, ministerimilu sinnerisa inissitsiterneri allanngortillugit. Kommuninut qinersinermi ajorsarujussuarnertik soraarsitsinerminut tunngavigaa.

Tuluit Nunaanni nunasisut pinerluuteqarsimallutik parnaarussat parnaarussivinnit anisiinnarneqarsimaneri, nunanullu kingoqqiffiinut utertinneqanngineri nunap iluanut pissutsinut ministerip soraarsitaassutigaa.

Nunanulli allanut ministeri Jack Straw soraarsitaavinngikkaluarluni atorfimmut sunniuteqannginnerusumut nuutsinneqarpoq; tamannalu paasiuminaatsinneqarpoq.

Soraarsitsinerni, ministerillu akisussaaffiisa nikisinninerini Tony Blair-ip qinersinermi ajorsarujussuaraluarlutik suli nammineq naalagaanini ersersinniarpaa.

Partiip Labourip iluani pissaaneqarniuttoqarnera pasitsaanneqarpoq. Tony Blair Tuluit Nunaata oqaluttuarisaanerani kisiartaalluni qinigaaffinni tulleriinni pingasuni naalakkersuisuni siulittaasuuvoq.