Blair isumaqatigiissaarisitsiniarnermi pisortanngussagunartoq
Kangiani Qiterlermi sisamaagajuttunik taaneqartartut ullumi Jerusalemimi ataatsimiipput. Sisamaagajuttut tassaapput USA, EU, Rusland FN-ilu. Sammineqartussaq ataaseq malunnarnerpaavoq, tassalu Tuluit Nunaata qanittukkut ministeriunerisimasaanik taaneqartalersussaq Tony Blair USA-p præsidentiata George Buship kissaateqarneratut Kangiani Qiterlermi isumaqatigiissitsiniarnermi pisortassatut toqqarneqassammat.
Anne Mette Philipsenip, DR-imeersup, Blairip siunnersortigisimasaa naalagaaffimmut tunngasunut professori Mads Qvortrup atorfimmut tassunga Blairip periarfissai nalileqqullugit qinnuigaa.
-Tuluit Nunaanni aviisit nunanilu tamalaani nutaarsiassaqartitsiviit qularinngilluinnarpaat Tony Blair nutaamik pisortanngussasoq, illit qanoq isumaqarpit?
-Isumaqarpunga Blairip aqagu ullo’qeqqata kingornaninngaanniit arlaannik sumilluunniit suliaqalernissani atorfissaqartissagaa aammalu arlaanik nunanut tamalaanut tunngasunik. Blairip nalunngilaa suliaq ajorsarfigisani, tassalu nammineq Irakimut qanoq immaqalu muslimimik upperisallit silarsuaannut qanoq pissuseqarnini, soorlumilu tassani arlaanik iluarsisaqarusuttoq eqqaamaneqarusullunilu.
-Taamali oqaravit Irakimi sorsunneq taavat, siornalu aasami Libanonimi sorsunnermut tunngatillugu taamani Tony Blair Israelimiunut illersuisorujussuuvoq, tamakkua qanoq ataqatigiitsigippat Kangiani Qiterlermi eqqissineqarnissaa akunnermiliuffigineqassappat?
-Tamakkua imminnut ataqatigiippallaanngillat, tamatumanilu soorunami kia atorfinitsissaneraa apeqqutaanerpaavoq immaqalu kikkut sullinneqarnissaat apeqqutaavallaarani. George Buship assorsuaq soqutigissavaa sulinngiffeqarnissamini allat tamanna tigussallugu soqutigissappassuk taamaalillunilu Blair isumaqatigiissitsiniartussatut piukkunnartutut qinigassanngortilluni. Puigorneqassanngilarli suliassani taakkunani Blair Arabiamiut silarsuaanni assorsuaq nuannarineqanngimmat aammalu nuannarineqarnera annertusinaviarani Tuluit naalakkersuisui Salman Rushdie ”De Sataniske Vers”-imik atuakkiortoq saqqarmiulissallugu aalajangermata, nunanilu amerlaqisuni islamimik uppersaqarfiusuni akerliussutsimik takutitsisoqalruni. Taamaalilluni Blair Vestbreddenimi, Gazami muslimilluunniit silarsuaanni allami nuannarineqarujussuanngilaq.
-Taamaalilluni eqqumiikujuppoq Blair pineqassappat?
-Blair Israelimiunit akuersaarneqarpoq Arabiamilu naalagaaffinnit anginerusunit akuersaarneqarluni, muslimilli silarsuaanni akuersaarneqarrujussuarani, akerlianilli Saudi-Arabiamilu illoqarfinni pingaarnerni Egyptenimilu akuersaarneqarnerulluni.
