Biskoppit: Silarsuup naggatissaa qallivoq

Silaannaap pissusaata allanngoriartornera ullut naggatissaata qanillineranut takussutissaasinnaavoq.

Taama isumaqarpoq Danmarkimi Lolland Falsterip biskoppia, Steen Skovsgaard – aamma danskit ilagiit palasii arlallit taama isumaqarput.

- Ullut naggatissaanni Jiisusi takkutissaaq inuusut toqoreersimasullu eqqartuukkiartorlugit. Biibili naapertorlugu ulloq taanna takkutsinnagu takussutissanik pisoqartussaavoq, silaannaap allanngornera takussutissat ilagisinnaavaat, taama oqarpoq biskop Steen Skovsgaard.

- Pinngortitami pisartut pissusissamisuunngitsut sakkortuullu Naalakkap takkuteqqinnissaa sioqqullugu pisussatut biibilimi taaneqarput.

Silap sakkortuumik pissusilersornera takussutissat assigiinngitsut ilagiinnarpaat.

- Testamentitaami Jiisusi ullut naggatissaat sioqqullugu pisussat eqqartortillugit aperineqarpoq takussutissat suut takkukkumaarnersut. Akivoq amerlasuut tammartinniarlusi oqarumaarput uanga Kristusiuvunga. Sorsuuttoqartassaaq, inuit imminnut akerleriittassapput, kaannersuaqartassaaq aamma sakkortuunik pinngortitami pisoqartassaaq ikuallannersuit assigisaalu pisarlutik, Steen Skovsgaard oqarpoq.

Tassa Jiisusip takkuteqqinnissaa sioqqullugu piffissaq nuannersuinnaanavianngilaq. Kisianni ullut naggatissaata qanilleranut silaannaap allanngoriartorneri takussutissaappat? Biskop Steen Skovsgaardip tamanna nalornissutigaa. Kisianni biskoppeqataa, Århusip biskoppia Keld Holm nalornissuteqanngilaq.

- Silaannaap allanngoriartornera massakkut nalaatarput avatangiisitsinnut eqqortumik pissusilersorsimannginnitsinnut takussutissaasinnaavoq. Tassa inuit namminneq pilersitaraat isumaqarpungalu Guuti tamakkununnga akulerutissanngikkipput, Keld Holm oqarpoq.