Biskoppi: Uppertut tamarmik ajortiliupput
Nunarsuarmi silaannaap mingutsinneqarnerata kingunerisaanik ajornartorsiutit Norgemi Tromsømi ippassaq ataatsimeersuassutigineqarnerat sioqqullugu ilagiit assigiinngitsorpassuit naapeqatigiinneranni nunarput immikkut peqataatitaqaqqusaammat, biskoppi Sofie Petersen Tromsømeeqataavoq. Naalagiaqatigiinnermi ilaatigut biskoppiunerup Desmond Tutu-p peqataaffigisaani ilaaneq assut pissarsiffigalugu, Sofie Petersen oqarpoq.
-Naalagiaqatigiinnermi upperisarsioqatigiit assigiinngitsut najukkamik: Lutherikkut oqaluffianniippugut, kisianni soorlu paaveqarfimminngaanniit Vatikanet-mit najuuttoqarpoq katuullinik, russisk ortodoksinik, piinsilerisunik assigiinngitsorpassuarnillu, taavalu muuamaakkormiunit musliimi arnaq siornatigut avatangiisinut ministeriunikuusoq Iranimeersoq peqataavoq. Taassuma naalagiarnerup ingerlanerani inuulluaqqussut apuuppaa erseqqissarlugulu, soorlu Tutu-p oqaaluutsimini oqaatigaa, upperisarsioqatigiit suugaluaruttaluunniit assigiinngikkaluartoq inuiaqatigiit kikkuugaluarutta ataasiusutut pinngortitaq mianerisussaagipput.
-Tutu-p oqaatigivaa inuuneq qinerparput toqu qinernagu. Nammineq qanoq inooriaatsitsigut mingutsitsineq CO2, Kyotomi taanna isumaqatigiissut eqqarsaatigalugu, peqataasinnaanerput.
-Unikaallattoqarnissaa oqaatigaa, allaat ima sakkortutigisumik oqaatigalugu pinngortitarsuaq uagut Guutip pinngortitai namminerlu pinngortitaalluta aserorteratsigu pisooqataagatta, ajortulioqataasugut. Ajortiliusugut tamatta imannak nunarsuaq tunniunneqartoq sumiginnaratsigu, ajortuliorfigalugu, Sofie Petersen nassuiaavoq.
Nunarsuarmi mingutsitsinerup kingunerisaanik Manerassuarmi qeqertat kiviartulersimapput, nunarsuullu ilaani soorlu Afrikami imiinnaq amigaataalluni.
- Assut eqqarsarnarpoq. Qeqertani najugaqartut nunanilu imeqanngitsuni najugallit nunartik qimattariaqarpaa. Taamaammat ukiuni tulliuttuni qimaasut nunamik kiviartornerat pissutigalugu amerliartut nunarsuarmi takujumaarpagut, biskoppi oqarpoq.
- Peqataalluni pikkunaqaaq, assut eqqarsaateqarnarpoq.
Biskoppi Sofie Petersen aamma oqarpoq nunatsinni ilagiit sinnerlugit nammineq tunissutigisimallugit saaqquteeqqat. Issittumilu inuit ajornartorsiornerat ersersinniarlugu sermiminersuaq oqaluffiup iluani silataanilu aamma takuneqarsinnaasimavoq.
