Biskoppip sulinngiffeqarnissani ukiuni kingullerni pingasuni kinguartittareerlugu piviusunngortilerpaa. Tassami ukiuni kingullerni Ilageeqarnermut inatsissaq ulapputigisimavaa, taamaalillunilu aggustip aallaqqaataani inatsit nutaaq atulereerpat, ilageeqarnermullu tunngassuteqartut tamakkiisumik Namminersorlutik Oqartussaniit akisussaaffigineqalereerpata sulinngiffeqarnissaminut piffissaqalerpoq.
- Kinguartitseqattaaginnarsinnaannginnama ullulerpara, Sofie Petersen oqarpoq, nangillunilu:
- Sulinngiffeqarninni tussiutinut oqaluusiortarnernullu tunngasunik itisiliillunga ajoqusersorneqarnangalu suliaqassaanga, Sofie Petersen oqarpoq.
Qallunaat biskoppii, Kirkeministeriap ataani atorfeqartut, tulleriiaarlutik suliaminnut atatillugu sulinngiffeqartarput. Biskop Sofie Petersenillu sulinngiffeqarnissani Kirkeministeriamiit Namminersorlutik Oqartussanut atorfeqarnermi aggustip aallaqqaataani nuutsinneqarnerani tigummiinnarsimavaa.