Biskoppi: Poorskip nukissanik nutaanik tunisarpaatigut
- Neriuutitaartinneqartarpugut poorskip nalunaarutaanik tipaatsunnartumik tusarlerneqartarluta, tassa annaassiserput toqusunit makimmat uagut aamma neriugisaqalerpugut uaguttaq toqugutta toqusunit makikkumaartugut, kisianni aamma ulluinnarnut nuutinneqarsinnaavoq, tassa tusarlerneqarfipput tipaatsunnartoq, Jiisusip toqu uagut pilluta atorpaa, uagullu ajortivut taamaalillutik matoorneqarlutik, ajortitta isumakkiigaanerat taamaalilluta pigilerparput, Sofie Petersen oqarpoq.
Poorskisiortarneq qangatuulli ingerlanneqartarnersoq biskoppi Sofie Petersen aperigatsigu ima akivoq:
- Meeraagallarama inuusuttuugallaramalu, aamma palasinngoqqaaraama, nalliuttorsuit ataqqineqarnerullutik pipput, massakkut imaappoq pisiniarfiit, allaammi imerniartarfiit ammasarput. Inuit ullutsinni imatorsuaq pingaartorsiorneq ajorput, poorskilli oqariartuutaa allanngornavianngilaq, soorlu eqqaaginnassagutsigu aqqusinikkut ullumikkut ingerlagutta, ilisarisimanngikkaluaruttaluunniit pilluaqqoqatigiittarpugut, biskop Sofie Petersen oqarpoq.
