Aalajangiinissamik kinguartitsisoqarnera ajoringilara, Markus E. Olsen oqarpoq.Assi: KNR

Biskoppeqarfik: Markus E. Olsen pillugu suliamik aalajangiinissaq kinguartinneqarpoq

Palasitut suliunnaarallartitaaqqasoq akissutisinissaminut utaqqivoq. Tassungali tunngatillugu aalajangiinissaq sisamanngorpamut kinguartinneqassasoq, palasit peqatigiiffiata kissaatigaa.

Markus E. Olsen inuiattut juunip 21-anni ullorsiornitsinni naalagiartitsereerami Nuummi palasitut suliunnaarallartitaavoq.

Taanna soraarsinneqarnissamut allagarsiani pillugu nunatta biskoppianut kingusinnerpaamik aggustip sisamaanni akissuteqartussaasoq biskoppilu aamma tamanna pillugu akissuteqartussaasoq, taamaalioreerpatalu Markus E. Olsen palasitut atorfeqaannassanersoq soraarsitaassanersorluunniit aalajangerneqassasoq siusinnerusukkut nalunaarutigineqarpoq. Tamannali suli aalajangiiffigineqanngilaq. 

Suliaq naatsumik

Markus E. Olsen palasitut maanna suliunnaarallaqqatinneqarpoq.

Tassa imaappoq, suliartornissaminut pisinnaatitaanngikkallartoq.

Sermitsiaq.ag naapertorlugu palasip sooq suliunnaarallartitaanera kalaallit ilagiit paasitinneqarsimanngillat. 

Tusarfik tutsuiginartoq naapertorlugu Markus E. Olsenip oqaluffimmi qilaatersortoqarnissaanut qinnuteqarsimannginnera naalagiartitsinermillu allannguinissamut akuersissuteqarfigineqarsimannginnera pissutigalugit suliunnaarallarsinneqarpoq.

KNR-ip nunatsinni ilagiinni ilaasortat arlallit oqaloqatigai. Taakkulu isumaqataanngillat

Markus E. Olsenimi palasitut atorfeqaannassaneranik soraarsitaassaneranilluunniit aalajangiinissaq sisamanngorneq aggustip aqqarnganut kinguartinneqartoq, biskoppeqarfimmi pisortaq Mariane Hansen-Heilmann KNR-imut oqarpoq. 

AAMMA ATUARUK Landets mest omtalte præst tager ordet: Jeg har intet at miste

- Danmarkimi palasit peqatigiiffiat suliamik aalajangiinissamik kinguartitseqqusisuuvoq. Suliamik nangitsisussaq feeriarnikuunera peqqutaavoq, Mariane Hansen-Heilmann oqarpoq.

Markus E. Olsenip suliamik aalajangiinissamik kinguartitsisoqarnera pissusissamisoorluinnarsoraa. 

- Suliunnaarallartitaanera pillugu illuatungeriit tusarniaavigineqarnissaannut piffissaliussap kinguartinneqarnera pissusissamisoorsoraara, suliaq torinngitsumik ingerlanneqartoq, aamma suliami qulaajagassat arlaqartut isumaqarama, taanna KNR-imut oqarpoq.

Qilaatersorneq kunngikkormiullu

Markus E. Olsen inuiattut ullorsiornitsinni Nuummi Annaassisitta Oqaluffiani naalagiartitsigami qilaatersortitsivoq. Ilagiillu kalaallit ritualiat naapertorlugu palasitut kunngikkormiut naalakkersuisullu oqaluussinermini ilanngutussaagaluarlugit taamaaliunngilaq. 

Tusarfik tutsuiginartoq naapertorlugu Markus E. Olsenip oqaluffimmi qilaatersortoqarnissaanut qinnuteqarsimannginnera naalagiartitsinermillu allannguinissamut akuersissuteqarfigineqarsimannginnera pissutigalugit suliunnaarallarsinneqarpoq. 

AAMMA ATUARUK Makkorsip oqaluussissutaa teologip uparuaraa: Peqqarniitsoq kristumiorpalaanngitsorlu

Suliaq oqallisaaqaaq. Markus E. Olsenip suliunnaarallartitaanera pissusissamisoornersoq pissusissamisuunnginnersorluunniit pillugu isummat assigiinngeqaat.

Sisimiuneersoq Dorthea Isaksen Markus E. Olsenip palasitut sulilerseqqinnissaa kissaatigalugu atsiornernik juulimi katersivoq. Inuit 700-nit ikinnerunngitsut ullualuit ingerlaneranni atsiorput.

Suliaq inummut tunngasuunera pissutigalugu oqaaseqarfigiumanagu, Biskoppi Paneeraq Siegstad Munk KNR-imut siusinnerusukkut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl