Biskopinngortitsinissaq piffissaligaanngitsumik kinguartittoq
Naalakkersuisut biskopinngortitsinissaq novembarip ulluisa 22-anni pisussaagaluartoq aggustip aallaqqaataanut kinguartinneqartoq juunip ulluisa qulinganni nalunaarutigaat.
Naalakkersuisut nittartakkaminni taama allapput.
Piffissamili matumani Covid-19-ip tuniluunnera peqqutigalugu killilersuutinik nutaanik atuutilersitsipput.
Killilersuutit ilagaat illup iluani katersuussinnaanermut killiliineq, tassa susassaqartitsinerit assigisaallu illup iluani ingerlanneqassappata inuit amerlanerpaamik 20-nnaaqqusaapput.
AAMMA ATUARUK Paneeraq Siegstad Munk nunatsinni biskopinngorpoq
Biskopinngortitsinissarlu ilagiinni pisussat annerpaat ilagisussaammassuk, pissutsit nalinginnaasunngoqqeriarpata biskoppinngortitsilluni ivertitsinerit allat naligalugit ingerlanneqassasoq kissaatigineqartoq Naalakkersuisut allapput.
Killilersuinerit juulip 30-iata tungaanut ingerlassapput, sivitsorneqaqqinnissaalli suli nalunarmat Ilageeqarnermut naalakkersuisoq biskoppeqarfiup allaffia suleqatigalugu nalunaarutigineqarpoq, ivertitsinissaq ullulernagu kinguartinneqassasoq.
Ilageeqarnermut naalakkersuisoq Peter Olsen IA, tusagassiutinut nalunaarummini ima allappoq:
- Soorunami assut uggornarpoq aammaarluta biskopinngortitsinissaq kinguartittariaqaratsigu. Amerlavugut ullormut nalliussisassatsinnut qilanaarsimasut, kisianni pingaaruteqarpoq nunatsinni ilagiit nutaamik biskopinngortitsinissatsinni nalliuttorsioqataanissaat, piffissamilu matumani nalorninaateqarmat tamanna pisinnaanersoq, Biskoppeqarfik isumasioreerlugu pisussaq kinguartipparput, Peter Olsen oqarpoq.
