Birnap toqutaanerata paasiniaaffigineqarnera naammassigaat

Arnap 20-nik ukiullip Birna Brjánsdóttirip timaata toqungasup Reykjavikkip avatinnguani sissami nassaarineqarnerata paasiniaaffigineqarnera politiit maanna naammassivaat.

Suliallu unnerluussisussaatitaasumut ullumi tallimanngornermi tunniunneqarnissaa naatsorsuutigineqarpoq, unnerluussisussaatitaasullu angummut nunatsinneersumut Birna pillugu suliami pasineqartumut unnerluussummik suliaqarnissaa tullinnguuppoq. Islandimi politiit KNR-imut tamanna uppernarsarpaat.

Reykjavikkimi politiit paasiniasartuisa pisortaata Grímur Grímssonip islandimi nutaarsiassaqartitsivimmut RUV-mut oqaatigaa pasineqartoq ippassaq sisamanngornermi killisioqqinneqartoq, killisiorneqarneranili paasissutissanik nutaanik pissarsiaqarfiusimanngitsoq.

Pasineqartoq maanna sapaatit-akunnerini qulingiluani tigummigallarneqarsimalerpoq sulilu pinngitsuunerarluni.