Birnamik toqutsineq ikiaroornartulerinerlu ukiuni 19-ini parnaarussaassutigissagaa

Kalaaleq Thomas Møller Olsen Birna Brjánsdóttirimik toqutsisutut ikiaroornartunillu anngiortumik eqqussisutut ukiuni 19-ini parnaarussaasussanngorlugu tallimanngornermi eqqartuunneqarpoq.

Tamatuma saniatigut Islandimiut koruuniinik 7,5 millioninik, tassa danskit koruuniisa 450.000-it missaannik angajoqqaavinut taarsiisuteqartussanngorpoq. Suliami unnerluussisuusoq, Kolbrún Benediktsdóttir, KNR-imut taamatuminnga uppernarsaavoq.

Thomas Møller Olsen tamatuma saniatigut eqqartuussivimmi suliarinninnermi aningaasartuutit Islandimiut koruuunii 20 millionit, tassalu 1,2 millionit koruunit missaat, akilissavai.

Tassalu suliaq, Nunatsinni Islandimilu januaarimi quarsaarutaaqisoq, tamaannga killeqarallarpoq. Arnaq inuusuttoq Birna Brjánsdóttir illoqarfimmeereerluni arfininngornermi januaarip 14-ani unnuami tammarpoq. Arnamik inuusuttumik aappalaartunik nujalimmik ujaasineq Islandimiunit tamanit malinnaaffigineqarpoq.

Ajungiinnerpaamilli naggaterpiaanut kissaat ullut arfinillit qaangiuttut qaminneqarpoq. Birnammi timaa toqungasoq Reykjavikkip ungataani sissami nassaarineqarpoq.

Thomas Møller Olsen kilisaammi Polar Nanumi inuttaaqatinilu Birnamik ujaarinnittoqarnerani annilaarnangaartumik tigusarineqarput, kilisaammi Reykjavikkimiit avalareernikuulluni uteqquneqarpoq. Angutillu inuttat marluk Birna Brjánsdóttirip tammaaneqarneranut atatillugu tigusarineqarput.

Suliap suliarineqarnerani angut ataaseq suliami pisuunngitsuutinneqarluni iperagaavoq, Thomas Møller Olsenili januaarip 18-ianiilli sapaatip akunnerani matumani tallimanngornermi najuuffiginngisamini, eqqartuunneqarnissani tikillugu parnaarussaaqqalluni.

Suli uumasoq

Eqqartuussinerup suliarineqarnerani Birna Brjánsdóttir ipilluni toqusimasoq saqqummiunneqarpoq. Nakorsat toqusunik misissuisartut Thomas Møller Olsenip Birnap timaanik imaanut igitsinnginnerani, arnaq suli uumasimagaluartoq, uppersarnaatit atorlugit uppernarsarpaat.

Nakorsattaaq toqusunik misissuisartut, Thomas Møller Olsenip arnaq kiinaasigut tillussimagaa qimeriarsimagaalu uppernarsaatinik takussutisserpaat. Tamatuma kingorna arnap toqqutigisaanik, Reykjavikkip ungataanut imaanut nillertumut iginneqarpoq.

Birna Brjánsdóttir biilimi aappaluttumi, angutip maanna toqutsitut eqqartuunneqartup attartorsimasaani ikilerneqarsimavoq. Biilimi tassani naak biili arlaannit, qularnanngitsumik Thomas Møller Olsenimit salinniarneqarsimasoq uppernarsaatissaqaraluartoq ersarilluinnartumik aammik takussutissaqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat