Biologit: Raajartassiissutit ikilineqartariaqarput
Nunatta imartaani 2009-mut pisassiissutit ikinnerulersimanerat pissutigalugu, kiisalu canadamiut tamaani aalisarunnaarsimanerat pillugu, pisat 2009-mi 135.000 tonsinut ikileriassangatinneqarput.
Pisat tamarmiusut ukiuni 2005-mi 2008-milu ukiumut 150.000 tonsit missaannik amerlassuseqartarput.
Raajat amerlassusaat biologinit aarleqqutigineqarpoq.
Ukiut arlallit ingerlanerini raajaaqqat marlunnik ukiullit ikittuararsuusarsimapput taakkuuppummi
sisamanik tallimanillu ukioqaleraangamik aalisarneqalersartut, Pinngortitaleriffimmit tusagassiuutinut nalunaarteqarnermi taamatut allassimavoq.
Tamatuma saniatigut raajaqarfissuit siammarsimaffii annikilliartuinnarsimapput Sisimiullu avannaani taamaallaat raajaqarfeqarluni taamaalillutik raajat siammarsimaffiat annikillinerungaatsiarsimavoq. Taamaattumik 2010-imi raajartassat 110.000 tonisinut ikilisinneqarnissaat biologinit innersuussutigineqarpoq.
Tunumi raajartassat aappugumut allannguiffigineqaratik 12.400 tonsiunissaat siunnersuutigineqarpoq.