Biologi: Piniarneq piujuartitsinissamik tunngaveqanngilaq

Kalaallit Nunaanni puisinniartarneq arfanniartarnerlu piujuartitsinissamik tunngaveqanngilaq. Taama biologi Thor Hjarsen aviisimi Politikenimi ullumi oqallissaaruteqarpoq.
Allattoq Nukappiaaluk Hansen Magnussen
januaarip 18-at 2011 05:53

Biologi Thor Hjarsen oqarpoq kalaallit puisinniartarnerat, arfanniartarnerat imarmiunillu timmiarniartarnerat pijuaannartitsinissamut tunngaviunngitsut.

- Kalaallit Nunaanni piniartarneq 1900-miilli piujuaannartitsinissamut tunngaveqanngilaq, tassami teknologi siuariarnikuuvoq, piniartut aallaaseqarnerulerlutillu motooritalinnik angallateqalersimapput, taamaalilluni assigiinnginnerusumik piniarsinnaalersimallutik, tamannalu peqqutigalugu piniagassat ikiliartulersimallutik, Thor Hjarsen taama allaaserisaqarpoq, naqissuserpaali ukiuni kingullerni piniartut piujuartitsinissaq eqqarsaatigiartuleraat.

- Kalaallit Nunaanni arfanniartarnerat imarmiunillu timmiarniartarnerat iluarsiartorpoq, piniakkalli atorneqarluarsinnaanerat suli pitsanngornerusinnaalluni. Kalaallit Nunaanni imarmiut miluumasut 25 procentimiit 30 procentimut annaaneqartartut Thor Hjarsenip isornartorsiorpaa.

Taassuma aamma isornartorsiorpaa, sumiiffinni qimmeqarfiunngitsuni puisit amiiginnarlugit kangerlunni igiinnarneqartarnerat.

- Taamaasiortarneq piujuartitsinissamut tunngaveqanngilaq, taamaasiortarneq nuanninngilluinnarpoq, taama Thor Hjarsen allappoq.

Politikkerit, uumasunik illersuiniaqatigiiffiit kattuffii piniartullu Atlantikup avannaani Suleqatigiit aaqqissugaannik aqagu Folketingemi oqallisissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq