Biologi kalaallit saqqummiillaqqissumut nersornaasiuttagaannik tunineqarpoq
Biologi ph.d.-nngorniaq Nynne Hjort Nielsen, allaaserisaminut Marsvin i Vestgrønland – den ukendte hval, 10.000 koruuninik akissarsitinneqarpoq.
- Ilisimatusarfigisat tamanut paasiuminarsarlugit oqaluttuarinissaat imaannaanngitsuuvoq. Ilisimatuutut ilisimatusarfigisatta ilisimatuunut allanut saqqummiunneqarnissaat kissaatigisarparput, tamannali inunnut nalinginnaasunut iluaqutissartaqarneq ajorpoq. Taamaammat inunnut nalinginnaasunut oqaluttuarsinnaanissaq pingaaruteqartupilussuartut isigaara, nersornaatisisoq oqarpoq.
Allaaserisaq ajugaassutigisaa tassaavoq niisat nunatta imartaani angalasarnerat pillugu ilisimasat nutaat pillugit allaaserisaa, allaaserisarlu taanna Tidsskriftet Grønlandimi Sermitsiamilu saqqummersinneqassaaq.
Nr. 2-nngortoq 5.000 koruuninillu akissarsitinneqartoq tassaavoq itsarnisarsiuutut ilinniartoq Asta Mønsted, taassumalu allaaserisaa tassaavoq Genlyd fra fortiden om den arktiske tromme.
- Ilisimatusarfigisat, ilaatigut namminersuutigalugit suliat, pillugit paasissutissiiniarluni allaaserinninneq imaannaanngitsuuvoq, oqarpoq
Arktisk Institutip, Det Grønlandske Selskabip, Sermitsiap Royal Arctic Linellu Academicus Arcticus suleqatigiissutigaat, tamarmillu aningaasanik akissarsiassanut aningaasaliisimapput. Nersornaat siullermik 2011-mi tunniunneqarpoq.
- Det Arktiske Selskabip siulersuisuini isumaqaratta nuimanerit kisiisa nersorniarnagit inuusuttut ilisimatusarfiup avataaniittoqarneranik eqqumaffiginninnissaat pitsaasuussasoq eqqarsaatersuutigigatsigu, Arktisk Institutimi pisortaq Bent Nielsen oqarpoq.
Nr. 3-nngortoq 3.000 koruuninillu akissarsitinneqartoq tassaavoq Marc Jacobsen, nunat tamat akornanni pissutsinik ilisimatusartoq, allaaserisimallugu Kampen om Arktis.