Biologi Ilulissat Kangerluanni misissunissamut aningaasaliiffigineqartoq
Pinngortitaleriffimmi biologi Sascha Schiøtt ilisimatusartartunngorniarnissaminut 1,7 million koruuninik aningaasaliiffigineqarpoq.
Aage V. Jensen Charity Foundation aningaasanik tunnisisuuvoq, taamaalillunilu Sascha Schiøtt Århus Universitetimi Issittoq pillugu Ilisimatusarfimmi ph.d-ngorniarluni aallartittussanngorpoq.
Saschalu nuannaangaarluni novembarip aallaqqaataani aallartinnissaminut akuersaarluni allatsissimavoq.
AAMMA ATUARUK Umiarsuarmut misissuummut nutaamut 200 millioninik aningaasaliisoqalersoq
- Misissuiffigerusutakka misissorsinnaalerakkit qujamasoqaanga, Sascha Schiøtt oqarpoq nangillunilu:
Imaq nillernerulissagaluarpat kiannerulissagaluarpalluunnit tamanna qaleralinnut natsernullu qanoq sunniuteqartarnersoq misissussallugu soqutiginarnerutippara, aamma kangerlummi nerisaqaqatigiinneq misissuiffigissavara, biologi oqarpoq.
Sascha Schiøtt 2017-imi uumassusilerinermi kandidatinngorpoq, inaarutaasumik sammisani Ilulissat Kangerluanni natsernut qaleralinnullu tunngasut Pinngortitalerinermik Ilisimatusarfittaami saqqummiullugit, allagartartaaramilu Pinngortitaleriffimmi atorfinilluni.
PHD-ngorniarnermini Ilulissat Kangerluannut tunngasoq ingerlateqqittussaavaa, misissuinerit pingaarnersai kangerluup kujasissortaani ingerlanneqassapput ilaannikkullu avannaatungaani misissuisoqartassalluni.
AAMMA ATUARUK Aningaasaateqarfik Illorsuassamut 16 millionit koruuninik tapiissuteqartoq
Natseq pingaarnertut misissorneqassaaq paasineqareersimammat natsiit tassaniitttut kangerluup iluaniiginnarnerusartut. Tamaani qalerallit aamma aalisarneqartaqaat, taamaattumillu sumiiffimmi uumassuseqassutsip qaleraleqarneranut sunniutaasa qanoq pingaaruteqartiginera sammineqassalluni.
Sascha Schiøttip ph.d-ngorniarluni ilisimatusarnera ukiuni pingasuni ingerlanneqassaaq, Pinngortitaleriffik tusagassiuutinut taama nalunaaruteqarpoq.
AAMMA ATUARUK Issittumi ilisimatusarneq ilinniartitaanerlu pillugit ataatsimeersuartoqalersoq