Binzer tele-mi unammillernissamut qilanaarpoq

Tele Post maanna pisortatigoortumik nalunaaropq Michael Binzer pisortaanertut atorfinittussanngortoq. Taanna kingusinnerpaamik aprilip aallaqqataani atorfissaminut inississaaq.

Attaveqarnermut aqutsisoqarfik qanittumi aalajangerpoq Tele Post internetimi sullissinnermi kisermaassisinnaanngitsoq. Taamaammat suliffeqarfiit allat tele unammillersinnaanngorpaat. Unammilleqatigiiffiusumillu ingerlalernissaq Michael Binzerip pisortatut atorfimmut tassunga nuukkusuummerneranut pissutaaqataavoq.

- Tele Greenland piffissamut pissanganartulimmut ingerlavoq telemut tunngasut nutarteriffigineqarpata unammilleqatigiinneq annertusisussanngormat. Taamaammat isummertariaqarsimavunga, Michael Binzer nassuiaavoq.

Taamatuttaaq Tele Postip siulersuisui nalunaarput.

- Pisortaanertut atorfimmik inuttaliiniarnerminni siulersuisut pingaartissimavaat atorfinittussap Tele Greenland A/S-imik siuarsaaqataasinnaanissaa, taamaalilluni suliffeqarfik inuiaqatigiit kalaallit pisariaqartitaannut aammalu namminersortunngorsaalernerup kingunerisaanik atugassarititaasunut allanngulersunut suli pitsaanerusumik naleqqussarsinnaaqqullugu, Tele Postimi siulersuisut siulittaasuat Agner N. Mark nalunaarpoq.

Tele Postimi pisortaaninngortussap aamma inuiaqatigiinnut sullissinissamut tunngasut qissimingaalereerpai.

- Inuiaqatigiit kalaallit ineriartupiloorfiupput, nalunaarasuartaatitigut aammalu qarasaasiatigut attaveqaqatigiinneq ilinniagaqarnermut, peqqinnissamut, inuussutissarsiutinik ineriartortitsinermut, pisortat allaffissornerannut, assartuinermut, isumannaallisaanermut, aatsitassarsiornermut il.il. pingaarutilimmik inissisimalluni. Ingerlatseqatigiiffiup siuarsaqqinnissaanut misilittakkama atornissaat qilanaaraara, Michael Binzer oqarpoq.

Michael Binzer Air Greenlandimi pisortaanertut sulinermi saniatigut SAS-mi qaffasissumik aamma atorfeqarnikuuvoq.