Binzer: DIF arnarsiatut pissusilersorpoq

Danmarkimi Timersoqatigiiffiit kattuffiat DIF, ukiukkut Olumpiadeqarnissat sioqqullugit nunatsinnit sakkortuumik isornartorsiorneqarpoq.

Sakkortuumik isornartorsiuineq nunatsinneersup Martin Møllerip sisoraatinik appattartup Olympiademut peqataasussatut toqqagaanngitsoorsimaneranik imaqarpoq.

Michael Binzer Team Grønlandip siulittaasua sisoraatinillu arpalluni nunarput sinnerlugu Olympiadeqarnerani pingasoriarluni ilaasarsimasoq sakkortunerpaamik isornartorsiuivoq. Aviisimi Politikenimi ima issuarneqarluni:

- Nunatsinni timersornermik ilumoorussinnginnini pissutigalugu DIF qanganisarsiortumik eqqarsartarpoq, tassa nunatsinnut angajorsuartut imaluunniit arnarsiatut pissusilersorpoq.

Nunarput nunat tamalaat Olympiadertarneq pillugu Ataatsimiititaliaanni ilaasortanngortinnagu danskit aalajangiiuartassapput. Martin Møller Team Grønlandimit tamakiisumik aningaasalersorneqaraluarpalluunniit.

Taamaattorli danskit ukiukkut OL-mut peqataasoqassanngillat, nunatsinnullu atatillu immikkut aalajangersagaqartoqannginnera DIF-imit ajuusaarutissartaqanngitsutut isigineqarpoq.

- Aalajangersakkat Danmarkip naalagaaffiani timersartartunut tamanut atuupput, immikkullu akeqanngitsumik isertitsisoqarsinnaanngilaq, tamanna kalaallinut aamma atuuppoq, DIF-ip siulittaasua Kai Holm oqarpoq.