Billitsit akikillerusukkalurpaat, kisianni....

Timmisartumik angallannermi billetit akii appariartortittuarsinnaassallugit, Air Greenlandip pisortaanerata, Flemming Knudsenip, neriuutigaa, aningaasartuutissalli ukioq manna annertunerulersinnaanerat sillimmaffiginiarlugu Air Greenlandip siorna sinneqartoornerujussua ukioq manna anguneqarsinnaannginnerarlugu aamma oqarpoq:

- Ingerlatsinermi aningaasartuutit annertusiartornerat tamatumunnga pissutaapput, qanittukkullu billetit akiinik appaassisimanerput uuliallu akia aamma pissutaapput billetit akiinik appaaqqissinnaannginnitsinnut, Air Greenlandimi pisortaaneq Flemming Knudsen oqarpoq.

Akileraarutit ilanngareerlugit Air Greenlandip sinneqartoorutai siorna 64,7 million koruunit missaaniipput, aatsaat taama annertutigisumik sinneqartooruteqartoqarluni. Siorna angusaq 2003-mut naleqqullugu 29 mio. kr.-it sinn. pitsaaneruvoq, taamanikkut 35 mio. kr.-it miss.-iimmata.

Flemming Knudsenillu oqaatigaa Air Greenlandimi ingerlatsinermi immikkoortortat tamangajalluinnarmik aningaasatigut angusaqarfiulluarsimasut. Billetsimmi akikillissanerput? Naamiugallarooq.

- Suliffeqarfittut allatulli siunissaq pillugu naliliisariaqartarpugut, suliffeqarfiullu iluani suut ineriartortikkumallugit aningaasaliiffigissanerlugit nalilertarparput, Flemming Knudsen oqarpoq, nangillunilu:

- Nunap iluani ataqatigiinnermut attaveqarfiit ineriartortuaannarput, taakkulu malinnavigisiariaqarpagut, suliffeqarfillu Air Greenland patajaallisarniarlugu suliartariaqarpugut, tamannalu angusimavarput, Air Greenlandip pisortaanera Flemming Knudsen tunngavilersorpoq.

Nunanut allanut attaveqalersinnaaneq ammaffigineqarpoq, tamakkuli angussagaanni eqqarsaatigilluakkamik pilersaarusiornikkut aatsaat anguneqarsinnaassasut Flemming Knudsen oqarpoq.