Bilitsit akitsornerat kamaatigaat
- Qisuariaatiga siulleq tassaavoq, tassa uagut akilertussanngorparput Nuummiut akikitsumik Københavnimukartalernissaat. Maannami Air Greenland, Air Icelandilu unammilleqatigiilernikuupput, ukiuni 14-ini Blue Ice Explorer-imi Narsarsuarmiittumi pisortaq, Jacky Simoud oqarpoq.
Jacky Simoud-ip kamassutigeqaa, Air Greenlandip angallannermut akinik ullormiit ullormut akitsuimmat.
- Ullut qulit matuma siorna Narsarsuarmiit Københavnimut internetsikkut bilitsisinermi, bilitsip akia 1.000-kronimik akikinneruvoq.
Ullullu ikittunnguit ingerlaneranni, akit 500 kronimik ikilineqarput, sulilu akitoqaq uterteqqinneqanngilaq. Air Greenlandip asuli pilikkatigaatigut, uagullu aamma bilitsit akitsorneqarnerinik nalunaarfigineqarata, Jacky Simoud oqarpoq.
Air Greenlandip kujataani angallanneq 33 procentimik ukiut arlaqanngitsut matuma siornagut akitsuiffigaa. Assersuutigissagaannilu, aasamut juulip naanerani Nuummit Qaqortuliassagaanni utimullu 6.000 koruuneqarpoq. Akerlianilli Nuummit Sisimiunukassagaani Nuummullu uterluni, ulluni taakkorluinnarni bilitsi 3.000 koruuneqassaaq.
Jacky Simoud, Air Greenland pillugu ima oqarpoq.
- Oqartariaqarpunga Air Greenlandip aalajangertarmagu takornariaqarneq Kalaallit Nunaanni qanoq ingerlassanersoq. Eqqarsaatigissallugu avaqqunneqarsinnaanngilaq Air Greenland Ilulissani angisoorujussuarmik hoteliuteqarmat, Ilulissani Kangerlussuarmilu angalatitsiviit pingajorarterutaat aamma pigalugu, Jacky Simoud oqarpoq.
Kujataani takornariaqarneq maanna annertuumik eqqugaasoq Jacky Simoud oqarpoq.
- Angallanneq kujataanut ima akitsortigisimavoq, takornarianik kujammukartitsiniarneq ajornarsisimalluni. Tassami takornarissat Ilulissiartarput, Ilulissanut angallanneq akikinnerummat.
Air Greenland-imi pisortaq Michael Binzer tamanna pillugu ima oqaaseqarpoq.
- Bilitsit akikitsut maanna nungoreerput. Imaanngilaq Narsarsuarmiit Københavnimut angallanneq akitsorneqartoq. Kisianni tassa oqartariaqarpunga, bilitsit akikitsut nungoreersut, Michael Binzer KNRimut oqarpoq.
