Bilitsinik tuniniaariaaseq nutaaq isorinnitserpassuaqarpoq
Air Greenlandip qarasaasiakkut bilitsisititsisarnera nutaaq isorinnitserpassuaqarpoq. Tassami inissamik inniminniinermut atatillugu bilitsi akilerneqartussaammat. Kisianni pissutsinut qanga atuuttunut utersaartoqarnavianngitsoq pisortaq Michael Binzer oqarpoq.
Allattoq Louise M. Kleemann
apriilip 04-at 2008 07:35
Bilitsinik tuniniaariaaseq nutaaq amerlaqisunut ajornartorsiutaavoq. Ilaqutariippassuit angalanissartik pilersaarusiuleraangamikku aningaasat atugassatik tamakkerlugit katersorsimasanngilaat. Aningaasallu ileqqaakkat naammatsikkaangata bilitsit aappaluttut akikitsut nungunneqareersimasarput. Taamaattumik bilitsinik tuniniaariaaseq nutaaq
eqqarsarnartoqartoq naalakkersuisup Kim Kielsenip ukiumoortumik ataatsimeersuarnermi oqaatigaa.
Qarasaasiakkut bilitsisititsisarneq nutaaq timmisartuutileqatigiiffimmut anginngitsumut Air Greenlanditut ittumut naleqquttuusoq siunissamilu atuinnarniaritsik pisortaq Michael Binzer oqarpoq.
