Bilitsinik akikitsuerutissagunarpoq

Sinersortaatitigut angallanneq niuernerpalaartumik ingerlaannassasoq inatsisartut aalajangiusimaannarpassuk ukioq una qaangiuppat billitsit akikitsut pissarsiassaajunnaassapput.

Jørgen Wæver Johansenilli inatsisartut 8 million koruuninik qinnuteqarfiginiarpai, sinerissap ilaani eqqugaasut oqilisaaffiginiarlugit.

Sarpik Ittuk massakkut allanngorsarneqaleruttorpoq umiarsuarniartut ineeqqaniinngikkunik ilaasinnaajunnaarsillugit. Taamaasilluni Sarpik Ittuk 240-nik amerlassuseqartunik ilaasoqarsinnaasimasoq 80-nik ikinnerusunik ilaasoqartalissaaq.

Allanngortiterinermi billitsit akikinnerit pilliutigineqarput, taamaasilluni nunaqavissut akissarsiakitsullu ilaquttaminnut tikeraartarnerat eqqugaassaaq.

Politikerit niuernerpalaartumik anersaaqalernerat taamaasilluni innuttaasunut malunniuttussanngorpoq.

Eqqugaanerpaalli maannakkut ikiorserneqarsinnaanngussapput, attaveqatigiinnermut angallannermullu naalakkersuisoq Jørgen Wæver Johansen inatsisartunut 8 million kronenik qinnuteqarniarmat. Innuttaasulli timmisartuinnarmik angalalernissaat anguniagaaginnarpoq:

- Isaasalerlugu silaannakkut angallassinerup akikinnerpaaffimminut pisinneqarsinnaanera taanna suliassatta tulleraat tassanilu mittarfeqarfiit ingerlanneqarnerannut atatillugu pisariinnerusumik akikinnerusumillu aaqqissuunneqarsinnaanersut suliassanut ilaavoq. Kisianni nunatsinni nunami taamak angitigisumi silaannakkut angalaneq innuttaasut taamak ikitsigigallartillugit akisujuartussaavoq, Jørgen Wæver Johansen oqarpoq.