Biilo aamma T: Kalaallit inussiarnerlutillu ilakkuminartuupput
- Kalaallit inussiarneqaat, ilakkuminaqalutillu. Qujassutigaaralu nunarsuatsinni taamaattunik inoqarmat, Bilal Al Manti, Biilomik aamma taaneqartartoq oqarpoq.
Taassuma kammalaatigaa Achmed Ali Turki, aamma T-mik taaneqartartoq. Inuiaqatigiit kalaallit inuiaqatigiillu arabiamiut assigiissuteqarnerarpai, aanaajusoq ippassaanikkunni pulaarsimasartik assersuutigalugu.
Biilo aamma T Københavnimi ilinniarnertuunngorniarfiit ilaanni ilinniartuupput. Taakku Perlevennerimik imminnut taallutik DR-ip nittartagaatigut aallakaatitassiortarput, juullimullu ammartakkamut atugassanik Nunatsinni immiussileruttorlutik.
Københavnimilu illoqarferujussuarmi inuuneq ulapinnartuusinnaammat kammalaatimik Kalaallit Nunaannukarsinnaanissaat innersuussutigerusuppaat:
- Danmarkimi innuttaasut Kalaallit Nunaannukarnissaat innersuussutigiinnarusupparput, tamaanimi periarfissat amerlaqaat, pinngortitarlu angeqaluni. Pinngortitaq misigalugu eqqissinaqaaq, nuannerlunilu. Taamaattumik siornatigut misigisaqarsimannginnatta nuannisaqaagut, Kalaallit Nunaannut angalanerput puigornavianngilarput, Bilal Al Manti oqarpoq.
Kalaallit Nunaanni inooriaatsip Københavnimi inooriaatsimut naleqqiullugu assigiinngitsorujussuunera angalanermik nuannersisitsiinnartoq, Bilal Al Mantip oqaatigaa, assigiinngissutsit suunersut paasillugit angalanermik pissanganarsisitsisuunerat tikkuarlugu.
Bilal Al Manti aqagu Danmarkiliartussaavoq, Achmed Ali Turkilu Danmarkimut ataasinngorpat aatsaat utissalluni.
Tamarmik Danmarkimi inunngornikuupput, Kangia Qiterlermiilli kingoqqisuullutik. Achmed Ali Turki Irakimiunit kingoqqisuuvoq, Bilal Al Mantilu Libanonimiunit kingoqqisuulluni.
