Biilit suli amerliartorput
Januaarip aallaqqaataani 2016-imi biilit 4.186-it Nunatsinni nalunaarsorneqarsimapput, kisitsillu 3,9 procentimik januaarip aallaqqaanit 2015-imeersumit qaffassinnerulluni, imaappoq biilit 158-inik amerleriarsimapput.
Biilit ukiut ingerlanerini amerliartuinnarput, 2000-imiillu marloriaatinngupajaarsimallutik.
Nioqqutissanut assartuutit mikisut angisuullu januaarip aallaqqaani 2016-imi nalunaarsorneqarsimasut 1.315-ipput, ukiunilu kingullerni nikippiarsimanatik. Taamatullu qamuteralaat 1.179-it, nunaannakkoorutillu assakaasullit 207-it, januaarip aallaqqaataani nalunaarsorneqarsimapput. Akerlianiillu 2015-imi motorcykelit marluinnaat nalunaarsorneqarsimallutik.
Politiit ukiumoortumik kisitsisitigut paasissutissaataat naapertorlugit 2015-imi qamutit motoorillit 2.275-it nutaat nalunaarsorneqarput. 2012-imiilli nalunaarsuinernit nutaanit arfineq-pingasoriaammik amerlanerullutik, ukiumi tassani qamutit motoorillit 262-it nutaat nalunaarsorneqarmata.
Sanaartornermi assartuussuit, qamutit kalittakkat assigiinngitsut traktorillu maannakkumut nalunaarsorneqarsimanngitsut 2013-imi peqqussummik nalunaarsorneqaqqusaalernerinut kisitsisit qaffarujussuarnerannut peqqutaapput. Naatsorsueqqissaartarfik nittartakkamini taama allappoq.