Biilit parnaarneqanngitsut meeqqat ukiukitsut ussernartorsiortilersarpaat

Meeqqat ukiukitsut Nuummi biilinik kingumut tillinniartalersimapput. Januaarip ingerlanerinnaani biilinik tillinniarnerit 16-it politiinut nalunarutigineqarsimapput, tillittullu tassaanerusarsimallutik meeqqat 15-it inorlugit ukiullit.

Biilit parnaarneqanngitsut, matuersaataat atasut motooriiluunniit ingerlasut tillinneqarnerusartut, misissuinerit paasinarsisippaat.

Biilinik tillinniartarneq ilungersunartorujussuartut politiit isigaat, inuusuttuaqqammi biilersinnaanngitsut biilinik aallarussigaangata innuttaasut ulorianartorsiulersinnaammata, ilaatigummi sukkasoorujussuarmik ingerlaartarput.

Innuttaasut politiit sakkortuumik kajumissaarpaat, biilitik parnaaqqaartinnagit, matuersaatillu peeqqaartinnagit, qimattaqqunagit. Politiillu tassunga atatillugu aamma ilisimatitsissutigaat, biili parnaarneqarsimanngippat, matuersaatilluunniit atatiinnarneqarsimappata, tamanna unioqqutitsinerusoq, angallannermut inatsisinik unioqqutitsinertut pineqaatississutigineqarsinnaavoq, akiliisinneqarnermillu kinguneqarsinnaalluni.