Biilit Nuummi sakkortuumik aportut
Biilit sakkortuumik apornerat Nuummiit Nuussuarmut aqqusinermi Eqalugalinnguit tasiata qulinnguani sangorissami ajutoorfiusartumi "Dødemandssvinget"-mi pivoq.
Politiit oqaluttuarnerat malillugu biilit 47-nik ukiullip ingerlatai talerpimmut sanguallaarsimapput, sangunerminnilu biilit allat aappariit sisamanik ukiulimmik meerartallit biilerisai aporlugit.
Biilit 47-nik ukiullip ingerlatai - aqquserngup sinaani nakkarnissamut assiaqut aporiarlugu ammut assakarsimapput, tatsillu sinaanut nakkarlutik.
Politiit ilimagaat angut sukkavallaamik mianersuaalliorlunilu biilersimassasoq. Biilit tamarmik ajoquserujussuarput, biilinili issimasut tamarmik ajunngitsut, Nuummi politiit ilisimatitsissutigaat.