Biilit motooriisa ingerlaatinnartinneqartarnerat akerlilerneqarpoq
Naalakkersuisup, Ark´alo Abelsenip biilit uninngatillugit motooriisa ingerlatiinnartarnerisa inerteqqutaalersinnaanerannik oqaaseqarnerata kingorna, Nuup Kommuneani avatangiisit pillugit ingeniøri, Troels Dahl, oqarpoq avatangiisinik minguttitsinianngikkaani biilit uninngatillugit motooriisa ingerlatiinnartarnissaat kaammattuutigineqarsinnaanngitsoq, nangillunilu; pitsaanerpaajussagaluarpoq biilit uninngatiinarlugit inuit bussinut ilaaginnarsinnaasuuppata.
Biilit uninngaannaraluarunilluunniit motoori ingerlappat avatangiisinik minguttitsissaaq. Ukiuni makkunani silap pissusaata allanngoriartornera eqqarsaatigalugu tamatta akisussaaqataanitsinnik takutitsisinnaavugut, soorlu biilit ingerlatinnagit motooriata qamittarnissaa eqqaamallugu, biilillu aatsaat atortariaqavitsillugit atortarnissaat eqqaamallugu. Iluarnerpaajussaarlu bussit ilaaffigisaraanni, bussinut ilaasartut amerlippata silaanaq minguinnerulissaaq.
Misissuinerit takutippaat biilit motooriat nilloreersimasoq aallartikkaanni CO2-mik pujoralannillu minguttitsinerusartoq, aatsaallu 3-4 kilometerit ingerlareeraagami kissassusissani angusaraa, taamaammat pisiniarfiliapallanniarluni grillbariliarniarluniluunniit biilit uninngatiinnaraanni avatangiisinut iluarnerpaassaaq. Pisiniapallaannarlunili biilit atoraanni pisiniartilluni motoori qamikkaanni minutserpaaluit atorlugit nilloriartortarpoq, taamaammat biilit sivikitsumik qimanniaraanni motoorip qaminnissaa kaammattuutigineqarsinnaavoq. Danmarkimi Sverigimilu misissuinerit naapertorlugit sekundit 30-t biilit qimanniaraanni motooriata qaminnissaa minguttitsinnginnisaq eqqarsaatigalugu iluarnerusoq.
