Biilit innaallagissamik ingerlatillit ikuallalersitsipput
Oslomiit Københavnimut inunnik assartuummi umiarsuarmi "Pearl of Scandinavia"-mi ullaatunga biili innaallagissamik ingerlatilik ikuallappoq.
Biilip ikuallannera siaruapallassimammat, ilaasut umiarsuup neriniartarfianut qimarngutinneqartut qatserisussat biilit uninngaviannut qatseriartortinneqarput .
Ammulli suli apuutinngitsut inneq umiarsuup ikuallattoornermi qatserutaasa, namminneq aallartartut qamissimavaa. Taamaalilluni umiarsuaq kalinneqarani Københavnip umiarsualivianut tulassinnaasimalluni.
Politiit misissuinerminni paasivaat, biilip batteriata innaallagissamik immerneqarnerata nalaani ikuallanneq aallartissimasoq aammalu teknikikkut ajortoqarnera pisuulluni ikuallalersimasoq. Politiit oqaatigaat biili Nissan, inuata nammineerluni batteriinnarmik ingerlateqalersissimagaa.
Umiarsuaatileqatigiiffiup DFDS-ip oqaatigaa, aseruineq annertusimasoq, tamannalu pissutigalugu sapaatit akunneri, ikinnerpaamik arfinillit, umiarsuaq inunnik assartuisinnaanngikkallassasoq.
