Biilit eqqussuunneqartut misissuiffigineqarput
Nunatsinnut biilit eqqussuunneqartarnerinut atatillugu peqquserluttoqartarsimanissaa pasitsaanneqarluni misissuineq upernaaq manna aallartinneqarpoq.
Aningaasaqarnermut Naalakkersuisoq, pisut pillugit oqaaseqartinniaraluaratsigu, Naalakkersuisoq Josef Motzfeldt oqarpoq, bagmandspolitiit misissuinerat aatsaat naammassippat oqaaseqarumaarluni.
- Naalakkersuisut pisoq qangali pasitsaassimavaat, taamaammallu misissuineq aallartinneqarsimalluni, taamaammat politiit misissuinerat utaqqeqqaarusuppakka, Josef Motzfeldt naggasiivoq.
Ukiuni kingullerni arlaqalersuni biilinik atornikunik nunatsinnut eqqussuisarnerit amerliartorsimapput. Ukioq kingulleq Amerika avannarlermiit Canadamiillu Nuummuinnaq biilinik eqqussuisoqarsimavoq 50-nik, eqqussinermilu akileraarutinik peqquserluttoqartarsimassappat, aningaasat millionit arlallit landskarsip annaasimasinnaagai pasitsaanneqarsimalluni.