Biilinut akileraarut kukkusoq nassiunneqarpoq
Akileraartarnermut Pisortaqarfiup qamutit motoorillit akileraarutaannut, oktobarip aallaqqaataanniit marsip naaneranut akiliutissat allagartaat kukkunertallit nassiussuuteqqammerpai.
Tassa akileraarummut akiliutissat annertussusii kukkusumik amerlassusilerneqarsimasut, Akileraartarnermut Pisortaqarfimmit ajuusaarutigineqarluni ilisimatitsissutigineqarpoq.
Kukkuneq pissutigalugu akiliutissat allagartaat nutaat eqqortullu biiliutilinnut ulluni qaninnerni nassiussorneqassasut, pisortaqarfimmit ilisimatitsissutigineqarpoq erseqqissaatigineqarporlu akiligassat allagartaat siulliit akilerneqassanngitsut.
Kukkuneq pissutigalugu biilillit aningaaserivikkut Betalingservice aqqutigalugu akiliisartut akiligassanik marlunnik nassinneqassapput, akiligassarlu nassiunneqartoq kingulleq eqqortorlu kisimi akilerneqassaaq.
Biiliutillit akileraarutaannut akiligassat oktobarip sisamaannut akiligassanngortinneqarput, akiligassallu kingusinnerpaamik akilerneqareersimassapput oktobarip 20-ianni.
