Biilinik tillinniat angajoqqaavi ataatsimiisinneqarput
Meeqqat biilinik tillinniaqattaarsimanerat Nuup kommuneata kinguneqartinnialerpaa.
Nuup kommuniani miljøarbejderit sapaatip-akunnerani kingullermi, meeqqat biilinik tillinniaqattaarsimasut angajoqqaavinut pulaaqattaarput. Meeqqallu pineqartut qulit 15-illu akornanni amerlassuseqarput.
Taakkulu angajoqqaavi sisamanngormat unnukkut ataatsimeeqqatigineqarput, Pinaveersaartitsinermut Ilaqutariinnermullu siunnersuisartut peqatigalugit.
Ataatsimiinnermi aalajangiunneqarpoq, angajoqqaat oqaloqatigiittarfiannik pilersitsisoqassasoq, taamaalilluni assigiimmik ajornartorsiutit oqaloqatigiissutigineqarnissaat periarfissinneqarsinnaammat.
Taamatuttaaq angajoqqaat akornanni oqarasuaatitigut attaveqatigiittarnissaat pilersinneqarpoq, ajornartorsiortoqalersillugu angajoqqaat pilertortumik imminnut attaveqatigiittarniassammata.
Erseqqissaatigineqarporlu angajoqqaat arfineq-marluk aaqqissuussinermi peqataammata, angajoqqaallu sinneri kajumissaarneqaraluarlutik peqataanissaminnik kissaateqanngitsut Isumaginnittoqarfimmut nalunaarutigineqassasut.
