Biilinik nakkutilliineq aaqqiivigineqalerpoq

Allattoq Mads Lynge
septembarip 08-at 2006 07:15

Aalajangersimasumik biilinik nakkutilliisarneq pillugu ajornartorsiut aaqqiivigineqalerunarpoq.

Biilinik nakkutilliineq Danmarkimi angallannermut ministereqarfiup maanna akisussaaffigaa siornatigut inatsisinik atortitsinermik ministereqarfimmit akisussaaffigineqaraluartoq, maannalu aaqqiissutaasinnaasumik siunnersuuteqaqqammerput.

Siunnersuut nunatta politimesterianut nassiunneqareerpoq, akuersissutigineqaqqaassallunili.

Siunnersuut qanorpiaq imaqarnersoq angallannermut ministereqarfiup oqaatigerusunngikkallarpaa.

Biilinik nakkutilliinermut inatsisissaq nutaaq qaammatip ataatsip ingerlanerani Folketingimi akuerisassanngortinneqarumaartutut nunatta politimesteria Steen Thomsen naliliivoq.

Biilinik nakkutilliineq maannakkutut ingerlaannarallassaaq, tassa biilip tuneqqinneqarneratigut misissorneqartassalluni.