Biilinik eqqussuinermi peqquserluttuliortoqarpa?

Nunatsinnut biilinik eqqussuinermi aningaasanik peqquserluttuliortoqartarsimanersoq maanna paasiniarneqalerpoq.

Demokraatit inatsisartunut ilaasortaatitaata Lene Knüppel-ip naalakkersuisunut apeqquteqaateqarnermigut tamanna anguniarpaa.

Inatsisartut inatsisaat 1992-imeersoq tunngavigalugu biilit eqqussukkat tamarmik akitsuuserneqartarput.

Lene Knüppel-ip oqaasii malissagutsigik, taava inatsit pineqartoq ilumut unioqqutinneqartarsimanersoq maanna paasiniarneqalerpoq.

Taamaassimappat nunatta karsia koruuninik millionilikkaanik annaasaqarsimasinnaassaaq.

Biililerisunik ilisimasaqartup saaffiginninneratigut Lene Knüppel naalakkersuisunut apeqquteqaateqarpoq.

- Biili ataaseq tunineqaraangami tunisap allagartaannik marlunnik pilerneqartarpoq. Peqquserluttuliornermi tunisat allagartaasa aappaat kisimi tunniunneqartarpoq, taamalinikkullu akitsuutit nunatta karsianut ikineqartussat annikinnerulersarlutik, Lene Knüppel oqarpoq, nangillunilu:

- Ilumut taamaattoqartarsimanersoq paaserusunnarpoq.

Biilinik eqqussuinermi peqquserluttuliortoqartarsimanersoq politiinit aamma misissorneqaleruttorpoq.

Nunatta politimesteria, Steen Thomsen, radioavisimut oqarpoq bagmandspolitiinik taaneqartartut maajip qaammataani misissuinertik aallarnersimagaat.

Lene Knüppelip erseqqissaatigaa ilumut peqquserluttuliortoqartarsimanersoq ilisimaneqanngitsoq, paasiniarneqartariaqartorli.

Biilit Nuummut siorna eqqussorneqarsimasut kisiisa eqqaassagaanni, nunatta karsiata isertitai koruunit 4 millionit missaanniipput, biilit 50-it Nuummut eqqunneqarsimammata.

Ullut 14-it qaangiutsinnagit akissutisinissani inatsisartuni ilaasortap Lene Knüppelip kissaatigaa.